ناوەندی هەواڵ

 

هێرشەکانی ئیسرائیل بۆ سەر کەرتی ڕۆژئاوا بووە هۆی گیان لەدەستدانی ٥٤٦ کەس کە ١٣٣ کەسیان منداڵ بوون، ئەمە جگە لە زیانە مادییەکان و ئەو کاردانەوەی کە لەسەر کەرتی تەندروستی بەجێیان هێشتووە.

 

ڕێکخراوی تەندروستی نەتەوە یەکگرتووەکان لە ڕاپۆرتێکدا ڕایگەیاند، کە قەیرانی تەندروستی لە کەرتی ڕۆژئاوا بەهۆی هێرشە دووبارەکانی ئیسرائیل بۆ سەر دامەزراوە پزیشکییەکان و ئەو سنووردارکردنە توندانەی کە دەیسەپێنێت توندتر دەبێتەوە و داوای پاراستنی خێرا و کاریگەرانەی خەڵکی مەدەنی و سیستمی تەندروستی دەکات.

 

ڕێکخراوەکە ئاماژەی بەوەشکردووە، لێشاوی زۆرێک لە تووشبووانی کۆرۆنا بارگرانی لەسەر ناوەندە تەندروستییەکان دروستکردووە، چاودێری فریاگوزاری لەناو دامەزراوە تەندروستییەکاندا بەدەست فشارەوە دەناڵێنێت و بەهۆی نەبوونی پارە تەنها دەتوانێت بە ڕێژەی ٪٧٠ کار بکەن.

 

پێشتر نەتەوە یەکگرتووەکان لە سەرەتای دەستپێکردنی شەڕ لە کەرتی غەززەوە ٤٨٠ هێرشی بۆ سەر دامەزراوە تەندروستییەکان و ئەمبولانسەکانی کەرتی ڕۆژئاوا تۆمارکردبوو، کە بەهۆیەوە ١٦ کەس کوژراون و ٩٥ی دیکەش برینداربوون، هەروەها جەختی لەوە کردەوە کە دەستڕاگەیشتن بە چاودێری تەندروستی لە کەناری ڕۆژئاوا زەحمەتە بەهۆی داخستنی بازگەکان، زیادبوونی نائارامی و داخستنی تەواوەتی گوندەکان.

ڕوونیکردەوە کە قەیرانی دارایی لە دابینکردنی دارایی بودجەی وەزارەتی تەندروستی کاریگەری نەرێنی لەسەر کەرتی تەندروستی لە فەلەستین هەبووە، هەروەها کاریگەری لەسەر توانای کارکردن، بەکارهێنانی کۆگای بنەڕەتی دەرمان و کەلوپەلی بەکارهێنراوی پزیشکی لەناو کۆگاکانی وەزارەتدا هەبووە.