یه‌كه‌مین فێستیڤاڵی ئه‌ده‌بیی شیعری ژنان له هه‌ڵه‌بجه به‌ڕێوه‌چوو
یه‌كه‌مین فێستیڤاڵی ئەدەبیی شیعری ژنان بە دروشمی "ژنه‌كان ئه‌ستێره‌ن، له ساماڵدا جوانتر دەبریسکێنەوە" لە شاری هەڵەبجە بەڕێوەچوو.
هەڵەبجە
دوێنێ لە هۆڵی مستەفا زەڵمی لە شاری هەڵەبجە یه‌كه‌مین فێستیڤاڵی ئەدەبی شیعری ژنان بە دروشمی "ژنه‌كان ئه‌ستێره‌ن، له ساماڵدا جوانتر دەبریسکێنەوە" بۆ ئەدەب و شیعر و گۆرانی ژنان بەڕێوەچوو.
هه‌تاو محەمەد، شاعیری به‌شداربوو، وتی: ئه‌مه یه‌كه‌م فێستیڤاڵە له‌سه‌ر ئاستی عێراق و هەرێمی كوردستان به تایبه‌ت و له هه‌ڵه‌بجه به‌ڕێوه ده‌چێت، خۆشحاڵم بە بوونی ژمارەیەک دەنگ و قەڵەمی نوێ کە مینبەرێک هەیە بۆ ئەوەی بتوانن لە ڕێگەیەوە دەنگی خۆیان بگەیەنن.
تریفه ئه‌مینی له شاری مهابادەوە به گۆرانی بەشداری فێستیڤاڵەکە بوو و وتی: ژن كۆڵه‌كه‌ی هه‌موو شتێكه له ماڵ و کۆمەڵگەشدا، منیش پێمخۆشبوو هەندێک بەرهەمی فۆلكۆری پێشکەش بکەم.
خه‌مگین كۆساری شاعیرێکی ژنە و لە شاری سلێمانییەوە بەشدارە، ئەگەرچی چەندین ساڵە لە بوارەکە دابڕاوە، بەلام بە خۆشەویستی هەڵەبجەوە بەشداری کردووە و دەڵێت، داوای هەڵه‌بجه ڕه‌ت ناكه‌مه‌وه، هه‌بوونی سه‌كۆیه‌كی له‌م شێوه‌یه هۆكاره بۆ ده‌ركه‌وتنی ده‌نگی ژنان و به‌رده‌وامیدان پێی، تاوه‌كو ڕۆڵی ژن لە ئەدەبیاتدا دەربکەوێت.
له فێستیڤاڵەکەدا ٨ شاعیری ژن شیعره‌كانیان خوێنده‌وه و پاشان دوو لێکۆڵینەوە لە شیعری ژنان پێشکەشکرا و خەڵاتی ڕێزلێنان بەخشرایە ژنانی بەشداربوو.