ناوەندی هەواڵ

 

هەفتە چالاکییەکانی فێستیڤاڵی "کۆماری دیموکراتی ڤییەنا" لە ١٧ی ئایارەوە دەستی پێکردووە و تا ٢٣ی حوزەیران بەردەوام دەبێت، کە تیایدا چەندین هەفتەی هونەری لە بواری شانۆی قسەکردن، ئۆپێرا، مۆسیقا، سەما، نمایش، هونەری بینراو و چالاکی نمایش کراو پێشکەش دەکرێت، فێستیڤاڵەکە هاوکاتی ساڵرۆژی ڕاگەیاندنی کۆماری ئازادی ڤییەنایە و لەبەردەم هۆڵی شارەوانی شارەکەدا بە هەزاران کەس ئاهەنگیان بۆ ساڵیادەکە گێڕا.

 

 

ساڵڕۆژی ڕاگەیاندنی کۆماری ئازادی ڤییەنا بە پەخشی ڕاستەوخۆ پەخشدەکرا و چەندین لێدوان و وتار پێشکەشکران و چالاکوانان و گروپە ناوخۆیی و نێودەوڵەتییەکان بەشداریان کرد، ئیلهام ئەحمەد، سیاسەتمەدار و وتەبێژی کاروباری دەرەوەی خۆبەرێوەبەریی باکوور و ڕۆژهەڵاتی سووریا، بە پەیامێکی ڤیدیۆی وتارێکی پێشکەش بە هەفتەکانی فێستیڤاڵی ڤییەنا کرد و ساڵرۆژی ڕاگەیاندنی کۆماری ئازادی ڤییەنای بەرز ڕاگرت.

 

ئیلهمام ئەحمەد، کە لەدایکبووی عەفرینە و تا ساڵی ٢٠٢٣ هاوسەرۆکی دەستەی کارگێڕی ئەنجومەنی سووریای دیموکراتیک بوو و ئێستا وتەبێژی کاروباری دەرەوەی خۆبەرێوەبەریی باکوور و ڕۆژهەڵاتی سووریایە، پێشکەشکاری فێستیڤاڵەکە، بیبیانا بێگلاو، ئەکتەر، وەک "خوشکێکی کۆماری ئازادی ڕۆژاڤا" بە ناوی کرد و وەک یەکەم پەیامی سیاسی ئەو ئێوارەیە، پەیامی ئیلهام ئەحمەد پێشکەشکرا.

 

ئیلهام ئەحمەد وێڕای پیرۆزبایی لە ساڵرۆژی ڕاگەیاندنی کۆماری ئازادی ڤییەنا وتی: "لە ڕۆژئاوا- باکوور و ڕۆژهەڵاتی سووریاوە، لە شوێنی شۆڕشی دیموکراسی، ئیکۆلۆژی و شۆڕشی ژنەوە ، لە ناخەوە سڵاو لە کۆماری ئازادی ڤییەنا دەکەین، هیوادارین ئێوە ببنە پاڵنەر بۆ بڵاوبوونەوەی کولتوورێکی دیموکراسی و ئازادی ژن" هاوکات جەختی لە خەبات و شۆڕشی ژنان و هاوبەشی لە بیر و هزردا کردەوە و وتارەکەی بە دروشمی "ژن، ژیان، ئازادی" کۆتایی پێهێنا.

 

جێی ئاماژەیە، هەفتەکانی فێستیڤاڵی ڤییەنا لە ساڵی ١٩٥١ەوە مەیدانێک بووە قسەکردن، نمایش و کاری هونەریی لەسەر نەریت، داهێنان، پێشەنگایەتی و ئەزموونی دیموکراسی. فێستیڤاڵەکە تا ٢٣ حوزەیران بەردەوام دەبێت و بە گشتی ئەمساڵ لە فێستیڤاڵەکەدا زیاتر لە ٤٥ بەرهەم و پڕۆژەی هونەری لە بوارەکانی شانۆی قسەکردن، ئۆپێرا، مۆسیقا، سەما، نمایش، هونەری بینراو و چالاکی نمایش کراوە و دەکرێت، لەگەڵ گرنگیدان بە فۆرمات و پڕۆژەی بەشداریکردن لەگەڵ وەرگرتنی بێبەرامبەر، هەفتەیەکی فێستیڤاڵەکەش بۆ شۆڕشی ژن، ڕۆژئاوا و ژنۆلۆژی تەرخان کرا.