ڕوشیل جونیور

 

سوەیدا- لە ماوەی زیاتر لە ٧ مانگی خۆپیشاندانەکاندا، ڕۆژی هەینی ٢٩ی ئادار سەدان خۆپیشاندەر بە کارتی سپییەوە کۆبوونەوە بۆ دەربڕینی بزووتنەوەی ئاشتیانەیان و بەدیهێنانی ئاشتی و ئازادی و گۆڕانکاری سیاسی لە سووریا.

 

خۆپیشاندەرانی شاری سوەیدا چەند مانگێکە بەردەوامن و دەیانەوێت ئازادی و یەکسانی لە سەرانسەری سووریا بەدەستبهێنن، بە بەرزکردنەوەی کارتی سپی وتیان: ئێمە بۆردێکی سپیمان بەرزکردەوە بۆ دەربڕینی پاکی دڵمان و دەنگی بزووتنەوەکەمان.

 

ڕەشا خالید وتی: دڵمان سپییە و شۆڕشەکەمان ئاشتیخوازە، دەمانەوێت ئاشتی لە سەرانسەری سووریا سەرکەوتوو بێت، بۆیە ئەم کارتە سپییەمان هەڵگرت بەبێ نووسین چونکە ئێمە نووسیومانە و قسەمان کردووە و سوودمان لە هیچ شتێک نەبینیووە.

 

ئاماژەی بەوەشکرد کە لە یەکەم ڕۆژی خۆپیشاندانەکانەوە، ژنان و پیاوان ڕاوەستاون و داوای ئازادی و شکۆمەندی دەکەن لەم گۆڕەپانەدا و وتیشی: ژنان ڕۆڵێکی سەرەکییان هەیە لە بزووتنەوەی ئاشتیانەدا، چونکە ئەوان لە نێو ئەو کەسانەدان کە زۆرترین زیانیان بەرکەوتووە لە ماوەی قەیرانی سووریا کە زیاتر لە ١٣ ساڵە بەردەوامە.

 

ڕەحاب کەمالەدین ئاماژەی بەوەکرد ئەوان چەند مانگێکە لە گۆڕەپانەکەدان بۆ داواکردنی ئازادی و مافەکانیان کە چەندین ساڵە دزراون، وتی: مافی ئێمە لە یاسا و ژیانی کۆمەڵایەتی و ئابووری لادراوە، بەتایبەتی بەهۆی بڕینی کارەبا و تۆڕی پەیوەندیکردن، ئەمە ئازاری ئەو ژنانەی زیاد کردووە کە نازانن چۆن ماڵ بەڕێوەببەن بەهۆی نەبوونی هەموو پێداویستییە بنەڕەتییەکان و پێداویستییە سەرەتاییەکانی ژیان، داوا لە هەموو ژنان دەکەم پێکەوە کۆببنەوە بۆ ئەوەی بتوانن دەنگ و داواکارییەکانیان بۆ ئازادی لە سەرانسەری جیهاندا ببیسترێت.

 

مەیسا ئەلنەبوانی جەختی لەوە کردەوە، هەموو هەینییەک بە پەرۆشە بۆ ئەوەی لە گۆڕەپانەکەدا بێت هەتا ئەو کاتەی ئەوەی دەیانەوێت بەدەستی دەهێنن، کە بریتییە لە "ڕووخاندنی ڕژێم" و بونیادنانی سووریایەکی ئازاد و دیموکراتیک، وتی:  هەوڵی گۆڕانکاری دەدەین بۆ دروستکردنی داهاتوویەکی باشتر بۆ منداڵەکانمان و گۆڕینی ئەو بارودۆخە سەختەی کە خەڵکی سووریا ئەزموونی دەکەن، هەمیشە بەشداری لە خۆپیشاندانەکاندا دەکەم چونکە خۆم بە بەرپرسیار دەزانم بۆ گۆڕانکاری.