ناوەندی هەواڵ

 

سێ وڵات کە بە "ترۆیکا" ناسراون داوایان لە هێزەکانی پشتیوانی خێرا و سەربازی سودان کردووە کۆتایی بە ناکۆکییەکانی سودان بهێنێت کە ٨ مانگ لەمەوبەر بووە هۆی گیان لەدەستدان و ئاوارەبوونی هەزاران کەس.

 

ویلایەتە یەکگرتووەکانی ئەمریکا و نەرویج و بەریتانیا ڕۆژی ١٧ی تشرینی دووەم بەیاننامەیەکی هاوبەشیان بڵاوکردەوە کە تیایدا ئیدانەی زیادبوونی توندوتیژی و پێشێلکردنی مافەکانی مرۆڤ لە سودان دەکەن، بەتایبەتی هێرشەکانی هێزەکانی پشتیوانی خێرا "RSF" لە ڕۆژئاوا و ناوەڕاست و باشوور.

 

ئاماژە بەوەکراوە، ڕاپۆرت هەیە لەسەر کوشتنی بەکۆمەڵ، بەئامانجکردنی ڕەگەزی کۆمەڵگە نا عەرەبییەکان، کوشتنی سەرکردە نەریتییەکان، دەستگیرکردنی نادادپەروەرانە و ڕێگریکردن لە یارمەتییە مرۆییەکان، هەروەها ڕاپۆرتی توندوتیژی دژ بە هاوڵاتیانی مەدەنی لە شارۆچکەی جەبەل عەولا لە نیلی سپی.

 

وڵاتانی بەشداربوو جەختیان لەوە کردەوە، تا ئێستا هیچ ئاماژەیەک نییە بۆ چارەسەرێکی سەربازی بۆ ڕاگرتنی ناکۆکییەکان و داواشیان لە هێزەکانی پشتیوانی خێرا و سوپای سودان کرد ئەو توندوتیژییانە بوەستێنن کە دەبێتە هۆی دابەشبوونی زیاتری سودان لەسەر هێڵە ڕەگەزییەکان یان ڕاکێشانی هێزەکانی دیکە بۆ ناو ناکۆکییەکانی نێوانیان.

 

لە بەیاننامەکەدا هاتووە: لایەنەکانی ناکۆکییەکانی سودان پێویستە گرژییەکان کەم بکەنەوە و بەشداری لەو گفتوگۆیانەدا بکەن کە دەبنە هۆی ڕاگرتنی ناکۆکییەکان و گەیشتن بە هاوکارییە مرۆییەکان بەبێ بەربەست، گەیشتن بە چارەسەرێکی بەردەوام پێویستی بە کۆتاییهێنان بە توندوتیژی و دەستپێکردنەوەی پرۆسەی سیاسی هەیە کە هی خەڵکی مەدەنییە بۆ پێکهێنانی حکومەتێکی مەدەنی و گەڕاندنەوەی گواستنەوەی دیموکراسی لە سودان.