ناوەندی هەواڵ

 

شنۆ ئەشقی، ئەندامی فراکسیۆنی سەوز لە پەرلەمانی هەرێمی کوردستان، لە پەڕەی فەیسبووکی خۆی بڵاویکردووەتەوە کە ژمارەی توشبوون بە نەخۆشی شێرپەنجە بۆ ئاستێکی مەترسیدار بەرز بووەتەوە.

 

ئەو پەرلەمانتارە دەڵێت: بەو پێیەی ماوەی نۆساڵە ئامێری پشکنینی پێکهاتەی شێرپەنجەیی و پێکهاتە پارێزەرەکان لە کوالیتی کۆنترۆڵی جۆری خۆراک لە کارکەوتووە و بە بیانووی بێ بنەما چاک ناکرێتەوە، یاسای مافی بەکاربەر لە پەرلەمانی کوردستان دەرچووە و چەندین ساڵە کاری پێناکرێت، ژمارەی تووشبوون بە نەخۆشی شێرپەنجەش بۆ ئاستێکی مەترسیدار بەرزبووەتەوە.

 

شنۆ ئەشقی باس لە بازاڕی قاچاخ دەکات کە بازاڕەکانی سەرجەم شار و شارۆچکەکانی هەرێم پڕن لە خۆراکی تەزویر و تەقلید و قاچاغ، کاتێک لەلایەن لێژنەکانی قایمقامیەت و بەڕێوەبەرایەتی چاودێری بازرگانی دەستی بەسەردا دەگیرێت، دادگا بەهیچ جۆرێک کەیسەکانیان یەکلایی ناکاتەوە و... چەندین وردەکاری تر لە بارەی نرخ و کوالیتی خۆراک هەیە.

 

ئەگەرچی چەندین جار داوایان کردووە کە بانگێشتی وەزیری بازرگانی بکرێت بۆ لیژنەکەیان، بەڵام ڕەتدەکرێتەوە، لەو بارەیەوە ئەو ئەندامەی لێژنەی تەندروستی و ژینگە و مافی بەکاربەر، دەڵێت: بڕوام وایە کە ئاسایشی خۆراک لە ئاستێکی زۆر خراپدایە و بۆ ئەم مەبەستەش بۆ جاری چوارەم پێشنیارم کرد، لێژنەی تەندروستی و ژینگە و مافی بەکاربەر بانگهێشتی وەزیری بازرگانی بکات و ڕوونکردنەوەی پێویست بدات لەم بارەیەوە، بەڵام تەواوی ئەندامانی لێژنە ڕەتیان کردەوە کە وەزیری بازرگانی بانگهێشت بکرێت و دەڵێن ئاسایشی خۆراک هیچ گرفتێکی ئەوتۆی نییە.