ناوەندی هەواڵ

 

ساڵانە لە کاتژمێر ١١:٠٠ی پێشنیوەڕۆی ١٦ی ئاداردا، کوردان مەراسیمی وەستان بە بێدەنگی بۆ ڕێزگرتن لە شەهیدانی کیمیابارانی هەڵەبجە بەڕێوەدەبەن، ئەمساڵیش لە چوار پارچەی کوردستان و بەتایبەت باشووری کوردستان ئەم مەراسیمە بە پێنج خولەک بێدەنگی بۆ ڕێزگرتن لە شەهیدان بەڕێوەچوو.

 

لە ناوچە جیاوازەکانی باشووری کوردستاندا ترافیکەکان بەشێوەیەکی کاتی لە کاتژمێر  ١٠:٥٥ خولەک ڕاگیران و خەڵک کاروباری خۆیان ڕاگرت.

 

هاوکات لە سەرجەم دامەزراوەکانی خۆبەرێوەبەری باکوور و رۆژهەڵاتی سوریا فەرمانبەران و بەرپرسان کارەکانیان ڕاگرت و لەسەر شەقامەکان بۆ ماوەی پێنج خولەک بە بێ دەنگی وەستان.

 

هەمان مەراسیم لە باکوور و ڕۆژهەڵاتی کوردستانیش لەلایەن خەڵکەوە ئەنجامدرا، بەڵام لەو ناوچانە خەڵک وەک کردەیەکی خۆرسکی ئەنجامیاندا.