ناوەندی هەواڵ

 

دوای ئامەد و ئەنقەرە، داواکاری گشتیی ئەستەنبوڵ لێکۆڵینەوەیەکی نوێی دەستپێکرد، لەچوارچێوەی لێکۆڵینەوەکاندا، لە زۆرێک لە ناوچەکانی وەک باشاکشاهیر، ئەسەنیورت، ئارناڤوتکۆی و کوچوکچەکمەجە هەڵیانکوتایە سەر ماڵەکان.

 

بەپێی زانیارییەکان لە هەڵمەتەکەدا، لانیکەم ١٧ کەس دەستبەسەر کراون، کە ئەندامان و پێشەنگانی کۆنگرەی دیموکراتی گەلان-هەدەکە، پارتی دیموکراتی گەلان-هەدەپە و ئەنجومەنی گەنجانی پارتی چەپی سەوزی تێدایە.

 

دەستبەسەرکراوەکان گوازرانەوە بۆ بەڕێوەبەرایەتی پۆلیسی ئیستەنبوڵ، ٢٤ کاتژمێر قەدەغە خرایەسەر دەستبەسەرکراوەکان و هۆکارەکەشی بەهۆی بڕیاری نهێنی سەبارەت بە لێکۆڵینەوەکە نەزانراوە.

 

دوو ڕۆژنامەنووس ڕەوانەی دادگای ئەنقەرە کران

هاوکات دیجلە موفتوئۆغڵو، هاوسەرۆکی ڕیکخراوی دیجلە و فورات، سەدات یڵماز، سەرنووسەری ئاژانسی میزۆپۆتامیا و ١٧ کەسی دیکە، کە دەستبەسەرکربوون، دوای ئیفادە لە بەشی پۆلیسی ئەنقەرە، گواستراونەتەوە بۆ دادگای ئەنقەرە.

 

بڕیارە لە داواکاری گشتی دەست بە ئیفادەی ١٧ کەس بکرێت، لەناو دادگاکەدا "ناوچەیەکی بەشەکی سنووردار" دامەزرا و ژمارەیەکی زۆر لە پۆلیس لەناو بیناکەدا جێگیرکران.