ناوەندی هەواڵ

 

هونەرمەند شیلان ئەمین یوکسەککایا لە ڕۆژی ٨ی ئادار، ڕۆژی جیهانیی ژنان گۆرانی "سێ ژنی ئازاد" لە گردبوونەوەی ژناندا پێشکەشکرد، بەو هۆیەوە سکالایەک لەسەر ئەو هونەرمەندە تۆمار کرا و دانیشتنی یەکەمی دۆسیەکە لە دادگای تاوانە قورسەکانی ٢ی شاری وان بەڕێوەچوو.

 

شیلان ئەمین یوکسەککایا لە دادگای ئامەد لە ڕێگەی ئامێرەوە و یاسەمین دۆرا شەکەر، پارێزەری شیلان لە ڕێگەی ئامێرەوە لە دادگای ئەدەنەوە بەشداری دانیشتنەکەیان کرد، شیلان ئەمین یوکسەککایا ڕایگەیاند، کە لەسەر داوای ژنان گۆرانییەکەی وتووە و خوازیاربوو لەو دۆسیەیە بێتاوان بێت، هەروەها پارێزەرەکەی یاسەمین دۆرا شەکەر، ئەوەی خستەڕوو کە گۆرانییەکە قەدەغەکراو نییە و بە کۆنترۆڵی ڕۆشنبیری و گەشتوگوزاردا تێپەڕیوە دواتر لە ئەلبوومەکەدا بڵاوکراوەتەوە.

 

داواکاری گشتی دەیویست شیلان ئەمین یوکسەککایا بە تاوانی "ستایشی تاوان و تاوانکاری" سزا بدرێت و پارێزەکەشی داوایکرد دانیشتنەکە دوابخرێت.

 

بە بڕیاری دادگا دانیشتنەکە بۆ ١٦ی کانوونی دووەمی ٢٠٢٤ دواخرا.