سلێمانی

 

پێشنیوەڕۆی ئەمڕۆ، لە شاری سلێمانی تەڤگەری ئازادی کۆمەڵگەی کوردستان لە کۆنگرەیەکی ڕۆژنامەوانیدا بانگەوازی لە هاوڵاتیان و ژنان و گەنجان، لایەن و ڕێکخراوەکان کرد سەری ساڵی کوردی ئەمساڵ لە بناری قەندیل پیرۆز بکەن.

 

لە کۆنگرەکەدا تارا حسێن، جێگری هاوسەرۆکی تەڤگەری ئازادی ئاماژەی بەوەدا بەبۆنەی نزیک بوونەوە لە یادی نەورۆز و سەری ساڵێ کوردی ئەم نەورۆزە پیرۆز دەکەین لە هەموو گەلانی ڕۆژهەڵاتی ناوین.

 

تارا حسێن بەناوی تەڤگەری ئازادییەوە وتی: ئێمەش وەک نەوەکانی ئەم قۆناغە ئەرکمانە بەمەشخەڵی دەستمانەوە، ڕووبەڕووی دووژمنانی ئازادیی گەلەکەمان ببینەوە، هاوشان لەگەڵ بەخشینی خوێن، ڕۆح و قوربانییەکانمان، فەرهەنگ و کلتوورمان و بۆنە نەتەوییەکانمان زیندوو دەهێڵێنەوە.

 

لە کۆتایدا بانگەوازیی بەشداری نەورۆزی قەندیلی کرد و وتی: نەورۆز وەک جەژنی بەرخۆدان و تەحەدا بەرامبەر بە داگیرکاران بەجۆشتر دەکەین، ئێـمەش وەکو تەڤگەری ئازادیی بەشداری ئاهەنگی نەورز دەکەین کە لە ٢١/٣/٢٠٢٢ لە قەندیلی قەڵای بەرخودانەوە ئاهەنگی نەورۆز بەڕێوەدەچێت، بانگەوازی بۆ گەلەکەمان و تایبەت بۆ هەموو لایەنەکان و سیاسییەکان و ژنان و گەنجان و گرووپ و ڕێکخراوەکان، ئەوەیە کە بەشداری ئاهەنگی نەورۆز بکەن لە بناری قەندیل.

 

بڕیارە ئەمساڵ کاتژمێر ١١:٠٠ لە ڕۆژی ٢١ی ئادار، ئاهەنگی نەورۆز لە بناری قەندیل بە دروشمی " وەرن هەموو پێکەوە نەورۆزی ئازادیی لە قەندیل پیرۆز بکەین" و بە بەشداری هونەرمەندان سەمیرە کارزان، نیان عەبدوڵا، ژینا سەقزی، پەیام ڕۆژهەڵاتی، فەرشاد ئەمینی، هۆزان کاوە، لوقمان سەلیم، کەریم خان سوورچی و گروپی چیای شەنگال بەڕێوەبچێت.

ت.پ