ناوەندی هەواڵ

 

بەشێک لە داواکاران و چالاکوانانی مافی مرۆڤ، لە ڕاگەیاندراوێکدا، سەپاندنی سزای لەسێدارەدانیان بەسەر وریشە مورادی شەرمەزار کرد و هۆشدارییان لە "تسونامی لەسێدارەدان لە ئێران" دا.

 

واژۆکارانی ئەم بانگەوازە داوایان لە "گەلی ئێران، ڕێکخراوەکانی مافی مرۆڤ، حکومەتەکانی جیهان و ڕێکخراوە نێودەوڵەتییەکان، میدیا و ڕۆژنامەنووسان، هاوڵاتیانی ئێرانی لە دەرەوەی وڵات" کردووە "دەستبەجێ ڕێوشوێن بگیرێتەبەر" بۆ هەڵوەشاندنەوەی سزای لەسێدارەدان لە ئێران.

 

ئازەردەخت حەقجویان (دایکی ڕەزا ڕەسایی)، ئامینە قادری (دایکی زانیار مورادی)، بەیان عەزیمی، هاوسەری کۆچکردوو پێژمان فاتحی، دایە شەریفە حسێن پەناهی (دایکی ڕامین حسێن پەناهی)، سەلمە بەنی سەدر (یەکێک لە داواکارانی کارەساتی فڕۆکە ئۆکرانیا)، عەزمەت ئەژدەری (یەکێک لە داواکارانی کارەساتی فڕۆکە ئۆکرانیا)، فاتمە موجتەبایی (دایکی غەزالە چەلەوی)، مێرسدە قائدی، مەهسا پیرایی (کچی مینۆ مەجیدی)، هاوپەیمانی ژنانی چەپ، کۆمەڵەی خێزانەکانی داواکاری ئابان، کۆمەڵەی خێزانەکانی قوربانیانی فڕۆکەوانی پی ئێس، ئەنجومەنی ژن، ژیان، ئازادی (لە نورنبێرگ-ئێرلانگەن ، فرانکفۆرت، ماینز و گراز، نەمسا)، کۆمەڵەی ژنان لە کوردستان دژی هەڵاواردنی جێندەری، کۆمەڵەی نێودەوڵەتی سەربەخۆی پزیشکان و ستافی پزیشکی ئایفا، کەمپەینی مافی مرۆڤی بەلوچستان - بۆ دادپەروەری و یەکسانی ، کۆمیتەی ئازادکردنی زیندانیانی سیاسی لە ئێران، کۆمیتەی نیشتمانی بۆ داکۆکی لە مافی مرۆڤ لە ئێران، یەکێتی ژنان لە کوردستان، یەکەی نا بە تابۆ، نەبوونی توندوتیژی دژی ژنان و ...هتد لە واژۆکارانی ئەم ڕاگەیاندراوەن.

 

لە ڕاگەیاندراوەکەدا ئاماژە بەوە کراوە؛ چەند مانگێکە دەنگی "نا بۆ سێدارە" لە بەشی ژنانی زیندانی ئێڤین و بیست و چوار زیندانی دیکەوە دێت. دوابەدوای زیادبوونی سزای لەسێدارەدان لە ئێران لە ماوەی دوو ساڵی ڕابردوودا و لەسێدارەدانی زیاتر لە ٢٥٠ کەس لە دوای دەستبەکاربوونی حکومەتی نوێ، ڕۆژێک نییە کە ئێمە شاهیدی لەسێدارەدانی پێنج کەس لە ئێران نەبین، لەو چوارچێوەیەدا بانگەوازی لە گەلی ئێران، دەمودەزگاکانی مافی مرۆڤ، حکومەتە جیهانییەکان و ڕێکخراوە نێودەوڵەتییەکان، میدیاکان و ڕۆژنامەنووسان  و هاوڵاتیانی ئێرانی لە دەرەوەی وڵات دەکەین ، کە ئێمە بە نیگەرانی و پەشیمانییەکی قووڵەوە لە زیادبوونی بێوێنەی سێدارەکان لە وڵاتدا، ئەم بانگەوازەمان وەک هەنگاوێکی هاوبەش و ناڕەزایەتی جەماوەری بڵاو کردەوە و داواکارین کۆمەڵگەی نێودەوڵەتی دەستبەجێ فەرمانی ڕێوشوێنەکان بدات.

 

ناڕەزایەتییەکان بەرامبەر سزای لە سێدارەدانەکانی ڕژێمی ئێران و سزای لەسێدارەدانی وریشە مورادی و پەخشان عەزیزی، زیندانیانی سیاسی کورد لە زیندانی ئێڤین، بەردەوامن  و کەمپەینی "سێشەمەکانی نا بۆ سێدارەدان" کە لە ساڵی ٢٠٢٣ لە زیندانەکانی ئێران لە ناڕەزایەتی بە فراوانبوون و بەردەوامیی سێدارەکان لە ئێران دەستی پێکرد بە بەشداری ٢٥ زیندان لە ئێران لە ٤٣ مین هەفتەدا بەردەوامە.