ناوەندی هەواڵ

 

ئاسایشی هەولێر لە ڕاگەیەندراوێکدا ئاماژە بەوە دەکات، ئەو گروپەیان دەستگیر کردووە، کە هەڕەشەی بڵاوکردنەوەی ڤیدیۆ و وێنەی تایبەتیان لە چەندین ژن کردووە و تۆمەتبارن بە خۆکوشتنی چەندین ژن.

 

بەڕێوەبەرایەتی ئاسایشی هەولێر ئاشکرای کردووە، سەردەستەی گروپە مەترسیدارەکەی گۆڤەند CTSـیان لە دەرەوەی وڵات هێناوەتەوە بۆ ناو کوردستان و لەگەڵ باندەکەی دەستگیریان کردووە، ئەمەش لە ڕێگەی هاوکاریکردنی پۆلیسی ئینتەرپولەوە بووە.

 

'گۆڤەند' ناوی خوازراوە، ناوە راستییەکەی (ئ. ف. ت)ـە و ساڵی ١٩٩٣ لە پارێزگای هەولێر لەدایکبووە و لە وڵاتی تورکیا ژیاوە، سەرۆکی گروپەکە و پێنج کەسی دیکەی ئەندامی گروپی CTS دەستگیرکراون، بەشێکیان لەناو هەولێر بوون و بەشیکی دیکەشیان لە دەرەوەی وڵات دەستگیراون.

 

گروپەکە تا ئێستا تۆمەتبارە بە ئەنجامدانی ١٥٠ تاوانی ئەلیکترۆنی، خودی تۆمەتباران دانیان بەوەداناوە لە کاتی هەڕەشەکردن لە ژنان چەندین ژن خۆیان کوشتووە.

 

گۆڤەند و ئەندامانی گروپەکەی لە ماوەی زیاتر لە پێنج ساڵی رابردوودا لە ڕێگەی چەند گروپێکی تێلیگرامەوە نزیکەی ٥٠٠ ڤیدیۆ و وێنەی نەشیاوی کچان و کوڕانی هەرێمی کوردستانیان بڵاوکردبووەوە، جگە لە هەڕەشەکردن و پارە وەرگرتن لە سەدان کچی دیکە لە ترسی ناوزڕاندن و بڵاوکردنەوەی نهێنییەکانیان.