ناوەندی هەواڵ

 

بەپێی ڕاپۆرتێکی ڕێکخراوی مافی مرۆڤی عەفرین-سووریا لە ماوەی ٦ ساڵدا لانیکەم ١٠ هەزار و ٣٣٢ کەس ڕفێندراون و ٤٦٣ کەس کوژراون و ١٤٢ ژنیش دەستدرێژی سێکسیان کراوەتە سەر لە شاری عەفرین لە باکوور و ڕۆژهەڵاتی سووریا، کە لە ژێر دەسەڵاتی دەوڵەتی داگیرکەری تورکیا و چەتەکانی دایە.

 

ڕاپۆرتەکە لەلایەن ڕێکخراوی مافی مرۆڤی عەفرین-سووریا سەبارەت بە پێشێلکارییەکانی دەوڵەتی تورکیا ئامادە کراوە و ڕەوانەی ڕێکخراوی لێبوردنی نێودەوڵەتی و ڕێکخراوە نێودەوڵەتییەکانی مافی مرۆڤ کراوە.

 

ڕۆشین حەدۆ، هاوسەرۆکی سەندیکای پارێزەرانی کانتۆنی عەفرین-شەهبا، سەبارەت بەو پرسە لێدوانی بۆ ئاژانسی هەواڵی هاوار نیوز داوە و باسی لەوەکردووە، هەموو جۆرە هێرشێک لە عەفرین ئەنجام دەدرێت، "بەتایبەت ژنانی گەنج لە ڕێگەی هەڕەشەوە هاوسەرگیریان پێدەکرێت و ڕادەستی چەتەکان دەکرێن، کچان دەڕفێنرێن و داوای فیدیەی گەورە لە خێزانەکانیان دەکەن بۆ ئازادکردنیان. دەوڵەتی تورکیا بەم کردەوانەی هەوڵی تۆڵەسەندنەوەی شکستی داعش دەدات. ڕێکخراوی مافی مرۆڤ دوای ساڵ ڕاپۆرتێکی لە ٢٦ی شوباتی ٢٠٢٤ بڵاوکردوەتەوە و بۆ یەکەمجار ڕایگەیاند کە هێرشی مرۆیی لە عەفرین ئەنجام دەدرێت".