ناوەندی هەواڵ

 

لە چوارچێوەی سەردانێکدا بۆ شاری ئامەد كە بەمەبەستی بەشداریكردن لە نۆیەمین فێستیڤاڵی شانۆی ئامەد بوو، ڕۆژی ٢٠ی نیسان بەڕێوەبەری گشتی ڕۆشنبیری و هونەری سلێمانی و چەند هونەرمەندێكی كوردستان سەردانی هاوسەرۆكانی گەورە شارەوانی ئامەد-یان كرد و لەلایەن عایشە سەرا بوجاك و دۆغان هاتون، هاوسەرکانی شارەوانی گەورەی ئامەوە بە گەرمی پێشوازیكران.

 

سەرەتا پیرۆزبایی ئەو سەركەوتنی هەڵبژاردنی شارەوانییەكانی توركیا کە بەدەستیان هێناوە و بوون بە هاوسەرۆكی گەورەترین شاری باكووری كوردستانیان لێکراو دواتر گفتوگۆ كرا لە بارەی ئاڵوگۆڕی كولتووری و هونەری و ڕۆشنبیری لە نێوان هەرێمی كوردستان و باکووری کوردستاندا، لە پێناو برەودانی زیاتر بە مێژوو و كولتووری كورد لەسەرتاسەری كوردستان.

 

پاشان، قەڵغانی ڕێزلێنانی پایتەختی ڕۆشنبیری پێشكەش بەهاوسەرۆكانی شارەوانی گەورەی ئامەد کراو لەبەرامبەریشدا هاوسەرۆکان سوپاسگوزاری ئەو سەردانە بوون و پێزانینی زۆریان هەبوو، بە تایبەت كە پێشوازیان كردووە لە نوێنەرانی شاری سلێمانی وەكو یەكێك لە شارە زیندوو و ڕۆشنبیرییەكانی كوردستان.