ناوەندی هەواڵ

 

٣ی نیسان، میدیاکان بڵاویانکردەوە، هێرشەکانی ئیسرائیل بۆ سەر باشووری لوبنان زیانی بە نزیکەی ٥٥ شارۆچکە گەیاندووە، لەوانەش شارۆچکەی ناقورا، جەبەل لەبونە، ناوچەکانی جەبەل عەلام، عەمەل شەعب، ڕامیە، ئەلبستان و چەندین ناوچەی دیکە، هەروەها بووە هۆی برینداربوونی زیاتر لە هەزار و ٢٠٠ کەس و دەیان کەس کوژران و هەزاران کەسیش لە ماڵ و حاڵی خۆیان ئاوارەبوون.

 

لە بەرامبەردا وەزارەتی دەرەوەی لوبنان پێشتر ڕایگەیاندبوو کە ٢٢ سکاڵایان لە ڕێگەی نوێنەرایەتی هەمیشەیی لوبنان بۆ نەتەوە یەکگرتووەکان لە نیویۆرک ناردووە و تیایدا هەڵویستی خۆیان دژی ئیسرائیل بۆ ئەمینداری گشتی نەتەوە یەکگرتووەکان و سەرۆکی ئەنجومەنی ئاسایشی نەتەوە یەکگرتووەکان خستووەتەڕوو.

 

ئاماژەی بەوەشکرد، لەڕێگەی سکاڵاکانەوە، پێشێلکارییەکانی بڕیارنامەی ١٧٠١ی ئەنجومەنی ئاسایشی نەتەوە یەکگرتووەکانیان بەڵگە کردووە، داوای لە ئەندامانی ئەنجومەنی ئاسایش کردووە ئەم هێرشانە ئیدانە بکەن و داوای ئەوە بکەن کە ئیسرائیل پێشێلکارییەکانی سەروەری لوبنان ڕابگرێت و ڕێگری لە سەرهەڵدانی شەڕی ناوچەیی بکات.

 

جێی ئاماژەیە هێرشەکانی ئیسرائیل بۆ سەر باشووری لوبنان هاوکات بووە لەگەڵ شەڕی کەرتی غەززە لە ٧ی تشرینی یەکەمی ٢٠٢٣.