ناوەندی هەواڵ

 

لە ساڵی ٢٠١٤ەوە لەکاتی دروستکردنی قەیران و نەدانی موچەی دەیان مانگی فەرمانبەران، بە هەزاران خوێندکاری زانکۆو پەیمانگەکانیش لە دوای تەواوکردنی خوێندن دانەمەزراون و سەرەڕای داواکاری بۆ دامەزراندن هیچ وەڵامێکیان وەرنەگرتووە، هەربۆیە گردبوونەوەیەکان بەردەوامییان هەیە.

 

بەیانى ئەمڕۆ ١٧ی ئەیلوول، لە هەریەکە لە پارێزگاکانی سلێمانى و هەڵەبجە و شارۆچکەی کۆیەی سەر بە پارێزگای هەولێر و  ئیدارەکانى گەرمیان و ڕاپەڕین، مامۆستایانى وانەبێژ لە بەردەم بەڕێوەبەرایەتى پەروەردەى ناوچەکانیان گردبوونەوە.

 

وانەبێژان ئاماژەیان بەوەکرد، داواکارن حکومەتى هەرێمى کوردستان بە شێوەى هەمیشەیی لە ناوەندەکانى خوێندن دایانبمەزرێنێت.

 

ئەوەشیانخستەڕوو، چەندین جار گردبوونەتەوە و داوای دامەزراندنی هەمیشەییان کردووە، بەڵام تا ئێستا حکومەتى هەرێمى کوردستان وەڵامی نەداونەتەوە.