سلێمانی

 

شانێکی نێودەوڵەتی گەنجان کە پێکدێن لە کۆمەڵێک ڕۆژنامەنووس، چالاکوان و گەنجانی شۆڕشگێڕی ئەوروپی بۆ لە نزیکەوە ئاگاداربوون لە هێرشەکانی دەوڵەتی تورکیای داگیرکەر و هەوڵدان بۆ ڕاوەستاندنی هێرشەکان هاتوونەتە باشووری کوردستان و لە چەند ڕۆژی ڕابردووشدا سەردانی قەندیلیان کرد و شوێنی بۆردومانی فرۆکەکانی دەوڵەتی تورکیایان بەسەرکردەوە.

 

ئەمڕۆ لە شاری سلێمانی سەردانی ڕێکخراوی کۆنگرەی ستاریان کرد و لەلایەن لەیمان شویش، نوێنەری ڕێکخراوەکە پێشوازییان لێکرا.

 

لە کۆبوونەوەیەکدا شاندی نێودەوڵەتی گەنجان ئامانجی خۆیان لە هاتنە باشووری کوردستان و سەردانی ڕۆژئاوای کوردستان خستەڕوو، هەردوولا باسیان لە مەترسییەکانی هێرشی دەوڵەتی تورکیای داگیرکەر کرد و پلانەکانی دەوڵەتی تورکیا بۆ داگیرکردنی باشوور و ڕۆژئاوای کورستان خرایەڕوو.

 

زاخاشپید، گەنجێکی ئەڵمانییە و لەگەڵ شاندەکەدا بە نیازبوون لە دەروازەی فیشخاپورەوە بچنە ڕۆژئاوای کوردستان، بەڵام لەلایەن پەدەکەوە ڕێگریان لێکرا، وتی: دەمانەوێت بچینە ڕۆژئاوای کوردستان لە دیموکراتی و پێکەوەژیانی لە باکوور و ڕۆژهەڵاتی سووریادا هەیە فێرببین، دەشمانەوێت پشتیوانی هێزەکان بین لە ڕۆژئاوای کوردستان و لە نزیکەوە شۆڕشی ژن ببینین کە چۆن گۆرانکاری لە ناوچەکەدا کردووە و بتوانین هەمان سیستمی ڕۆژئاوای کوردستان لە وڵاتانی دیکە بنیاد بنێین.