هەڵەبجە

 

پێشنیوەڕۆی ئەمڕۆ لە دیوانی قایمقامیەتی شاری هەڵەبجە بە بۆنەی ڕۆژی جیهانیی هۆشیاری ئۆتیزمەوە، پڕۆژەی گوڵەبەڕۆژە بۆ هاوکاریکردنی کەسانی خاوەن پێداویستی تایبەت ڕاگەیەندرا و چەند چالاکییەک پێشکەش کرا.

 

نیان عەزیز، سەرپەرشتیاری دەروونی و کۆمەڵایەتی لە ڕێکخراوی نوێ وتی: ئەمرۆ پڕۆژەیەکی جیهانیمان بۆ هەڵەبجە ڕاگەیاند، کە ئەنجامی بەشداریکردنمانە لە کۆنفرانسێکدا لە وڵاتی نەمسا کە ناوی پڕۆژەکە گوڵەبەڕۆژەیە، ئەمەش بەو واتایەی کە کۆمەڵێک گرفتی نادیار وەک ئۆتیزم و ٩٠ جۆری تر لە نەخۆشی هەیە، کە تووشی توندوتیژی دەبنەوە، لە بارەیەوە هۆشیاری بڵاوبکەینەوە، بۆیە ڕێکخراوی کەم ئەندامان و قایمقامیەتی هەڵەبجە پڕۆژەکەیان ڕاگەیاندووە.

 

نیان عەزیز وتیشی: ئەم پڕۆژەیە لە ڕێگەی لیژنەوە دیاری دەکرێت و لۆگۆیەکی تایبەتیان پێدەدرێت، پاشان لە ڕێگەی کەناڵەکانی ڕاگەیاندنەوە لۆگۆکان دەناسێنرێت، چونکە کۆمەڵێکی زۆر خەڵک هەیە کە بەهۆی گرفتە نادیارەکانەوە لە کۆمەڵگە دابڕاون و بەدەست کێشەکانەوە دەناڵێنن.

 

هەر ئەمرۆ لە چەندین چالاکی هەمەجۆردا هاوکاری کەسانی خاوەن پێداویستی تایبەت لە ڕووی مادییەوە کرا و چالاکی هونەری پێشکەش کرا.