ناوەندی هەواڵ

 

٤٣ ڕێکخراوی نێودەوڵەتی مافی مرۆڤ داوای لێکۆڵینەوە لە پێشێلکارییەکانی دژی ژنان لە زیندانی ئەوی دەکەن و لەو بارەیەوە ڕاگەیاندراوێکیان بڵاوکردەوە، لە ڕاگەیاندراوەکەی ئەو ڕێکخراوانەی مافی مرۆڤدا کە بە چوار زمانی جیهانی بڵاوکراوەتەوە و هاتووە، لە ئێستادا نزیکەی ٧٠ ژنە زیندانی سیاسی لە زیندانی ئەویندا هەن و ئەو ژنانە تەنیا بە هۆی خەبات لەپێناو ئازادی و مافی مرۆڤ لە ئێراندا گیراون و زیندانی کراون.

 

ئاماژە بەوەشکراوە، نیگەرانی خۆمان لە لێدانی ژنە زیندانیانی سیاسی لە زیندانی ئەوین دەردەبڕین، پاڵپشتیی ۆمان بۆ ئەو ژنانە و سەرجەم ئەو چالاکوان و هاووڵاتییانە دووپات دەکەینەوە کە داکۆکی و بەرگری لە مافەکانیان دەکەن، لەو زیندانەدا ئەو ژنانەی بەهۆی دەرىڕینی ناڕەزایەتیەوە توشی ئەنشکەنجە و لێدان و برینداری بوون بێبەش دەکرێن لە چاودێری پزیشکی گونجاو و گواستنەوەیان بۆ نەخۆشخانە، بەرپرسانی زیندانەکە وەڵامی داواکاری زیندانییەکان نادەنەوە دەربارەی تۆمارکردنی سکاڵا لە دژی پاسەوانانی زیندانەکە.

 

داوا دەکەین بەپەلە سزای لە سێدارەدانیی ژنان لە زیندانەکەدا ڕابگرن و سەرجەم زیندانیانی سیاسی ئازاد بکەن، داواش دەکەین بە خێرای ڕێوشوێنەکانی دەستەبەرکردنی سەلامەتی جەستەیی و دەروونی زیندانیان بگیرێتە بەر لە ئێران بەگشتی و بە تایبەتی بۆ ژنانی زیندانی ئەوین، هەروەها لێکۆڵینەوەیەکی ئازادانە و لەسەر ئاستی نێودەوڵەتی لە زیندانی ئەویندا بە مەبەستی ئاشکراکردنی ڕاستییەکان دەربارەی توندوتیژی دژی ژنانی زیندانی سیاسی ئەنجام بدرێت.