ناوەندی هەواڵ

 

بڕیارە ئەمڕۆ ٢٢ی نیسان، تەیب ئەردۆغان، سەرۆک کۆماری تورکیا سەردانی عێراق و هەولێر بکات کە ئامانج لێی داگیرکاری زیاترە لەسەر خاکی باشووری کوردستان و بەردەوامی دانە بە ئۆپەراسیۆنەکانی.

 

پەدەکە کە بەرامبەر هێرش و داگیرکارییەکانی دەوڵەتی تورک بۆسەر خاکی باشووری کوردستان بێدەنگەو پشتیوانێکی سەرەکی هێرشەکانە، شەقام و ڕێگا سەرەکییەکان و قەڵای هەولێری بۆ پێشوازیکردن لە ئەردۆغان بە ئاڵای تورکیا ڕەنگڕێژ کردووە.

 

دانانی ئاڵای تورکیای داگیرکەر لە شەقام و ڕێگا سەرەکییەکانى هەولێر بۆ ئەردۆغان لەکاتێکدایە کە ڕۆژانە دەوڵەتى تورک ناوچە جیاوازەکانى هەرێم بۆردوومان دەکات وهاوڵاتییان دەکاتە ئامانج، لە جیاتى ناڕەزایەتى  دەربڕین دژی شەهیدکردنى هاوڵاتییانى مەدەنی و داگیرکردنی خاکی کوردستان و تاڵانکردنى دارستانەکانى هەرێم، شەقامەکانی هەولێر هەمووی ئاڵای تورکیایان پیادا هەڵواسراوە و قەڵای هەولێر بە ئاڵای تورکیا سوور کراوە.

 

جێی ئاماژەیە، بەهۆی بۆردوومان و تیرۆری دەوڵەتی تورکەوە لە باشووری کوردستان شەوی ١٣ی نیسان، هاوڵاتییەک لە گوندی گەڵاڵەی ماوەت گیانی لەدەستدا، هەروەها لە شەوی ١٨ی نیسان دەوڵەتى داگیرکەری تورک بۆردوومانى سنووری برادۆستى کرد و بەهۆیەوە هاوڵاتییەک گیانی لەدەستدا، جگە لە بۆردوومانکردنی ناوچە شاخاوییەکانی مەتینا، گارە، شارباژێر و چەندین ناوچەی دیکەی باشووری کوردستان، کە ئامانجی سەرەکی لێی بە ئامانجکردنی هاوڵاتیان و داگیرکردنی خاکی کوردستانە.