ناوەندی هەواڵ

 

لە کابۆلی پایتەختی ئەفغانستان ژنانی گەنج کە ڕێگەیان پێنەدراوە بچنە قوتابخانە و دەست بە خوێندن بکەن، لە بەردەم قوتابخانەی ئامادەیی سەید ئەلشوهەدا چالاکیان ئەنجامدا.

 

ژنانی گەنج کە لە پۆلەکانی شەشەم و بەرەو سەر دەخوێنن، ڕێگەیان پێنادرێت بچنە قوتابخانەکان، ناڕەزایەتییان لەبەردەم قوتابخانەکەیان نیشاندا و پانکارتی ئێمە بچینەوە قوتابخانە"یان بەرزکردەوە و خوێندکارانی دیکە بەشداری چالاکییەکەیان کرد.

 

چالاکوانان داوایان لە دایکان و باوکانی ئەفغانی کرد کە پشتگیری مافی خوێندنی کچان بکەن و داوای لابردنی کۆت و بەندی تاڵیبانیان کرد، سومەییە حەقکۆ، خوێندکاری قوتابخانەی سەید ئەلشوهەدا، ئاماژەی بەوەدا کە دەیەوێت بچێتە قوتابخانە و وتی: هیوادارم کۆمەڵگەی نێودەوڵەتی و نەتەوە یەکگرتووەکان کاربکەن بۆ گەڕانەوەی کچان بۆ قوتابخانە و تیشکیشی خستەسەر بێدەنگی ڕای گشتی لەمەڕ ڕووداو و ڕێگرییەکانی لە ئەفغانستان بەڕێوەدەچێت.

 

ئەندامانی تەڤگەری ئازادی و دادپەروەری ژنانی ئەفغانیش ئیدانەی قەدەغەکردنی پەروەردەی کچانی تاڵیبانیان کرد، لە بەیاننامەیەکدا وتیان: "تاڵیبان کچانی بێبەشکردووە لە سەرەتاییترین مافەکانیان و مافە بنەڕەتییەکانی نیوەی کۆمەڵگای ئەفغانی پێشێل کردووە" لە ڕاگەیەندراوەکەدا هاتووە: "ئێمە بە توندی داوا لە حکومەتی تاڵیبان دەکەین کە دەرگاکان بە ڕووی خوێندنگاکانی کچاندا بکەنەوە".

 

قوتابخانەی سەید ئەلشوهەدا کوێیە؟

قوتابخانەی ئامادەیی سەید ئەلشوهەدا یەکێک بوو لە ناوەندەکانی بەر هێرش و پەلامارەکانی ساڵی ڕابردووی داعش کەوت، بەهۆیەوە ١٠٠ کەس کوژران و ٢٠٠ کەسی دیکەش برینداربوون، زۆربەی ئەو کەسانەی کە لە هێرشەکەدا گیانیان لەدەستداوە خوێندکارە کچەکان بوون.

 

ت.پ