زەینەب عیسا

 

 قامیشلۆ- شاندی ئیمراڵی پارتی یەکسانی و دیموکراسی گەل "دەم پارتی" ٢٧ی شوبات لەگەڵ ڕێبەری گەلی کورد عەبدوڵا ئۆجالان لە دوورگەی ئیمرالی کۆبووەوە، شاندەکەی ئیمراڵی بریتی بوون لە هەریەک لە پەروین بوڵدان، سیری سورەیا ئۆندەر، تولای هاتیمۆغولاری، تونجەر باکرهان، جەنگیز چیچەک، فایک ئۆزگور ئەرۆڵ و ئەحمەد تورک، دوای کۆبوونەوەکە لە ئیستەنبوڵ، پەیامی بەڕێز عەبدوڵا ئۆجەلان خوێندرایەوە، ڕێبەری گەلی کورد عەبدوڵا ئۆجالان لە پەیامەکەیدا بانگەوازێکی مێژوویی بۆ سیاسەتی دیموکراسی کرد.

 

 دایکی زیندانییەکان سەبارەت بەم پەیامە مێژووییەی بەڕێز عەبدوڵا ئۆجالان و بینینی وێنەکانی، کە بۆ یەکەمجار لە ماوەیەکدا بینران، بۆچوونی خۆیان بۆ دەزگاکەمان دەربڕی.

 

"ئێمە لەگەڵ ڕێبەرەکەمانداین"

 شازیە ئیبراهیم ئەندامی کۆمەڵەی خانەوادەی شەهیدان باسی لەو کاریگەرییە کرد کە بینینی وێنەکە لەسەری هەبووە و هەڵوێست و بۆچوونی خۆی سەبارەت بە پەیامی ڕێبەری گەلی کورد عەبدوڵا ئۆجالان بەم قسانە دەربڕی: کاتێک وێنەکانی ڕێبەر ئاپۆمان لە تەلەفزیۆن بینی دوای ماوەیەک کە سەردەمێک تێپەڕی، لەو کاتەدا منداڵەکان منداڵی بچووک لەدایک بوون و ئێستا بوونەتە شۆڕشگێڕ، پێویستە دەوڵەتی تورکیا باشتر بزانێت و نەڵێت گەلی کورد هەنگاوێک بۆ دواوە دەنێت، مەحاڵە ئێمە واز لە فەلسەفەی ڕێبەرمان بێنین و تەنانەت هەنگاوێکیش بۆ دواوە بنێین، ئێمەی دایکی شەهیدان دەڵێین دڵمان لەدەست داوە، بەڵام مێشکی ڕێبەرمان هەر ماوە و لەگەڵ ڕێبەرەکەمانداین،  دایکێک نییە بیەوێت منداڵەکانی شەڕ بکەن و خوێن بڕێژن، لەگەڵ بۆچوونی ڕێبەرەکەمان هاوڕاین کە وڵاتەکەمان بە ئاشتیانە دابمەزرێت و ڕێز لە مافەکانی کورد بگیرێت.

 

 " ئاشتی و برایەتی و یەکسانیمان دەوێت"

 شازیە ئیبراهیم داوای کرد وڵاتێک بە ئارامی و سەقامگیری دابمەزرێت و داوای ئازادی جەستەیی ڕێبەری گەلی کورد عەبدوڵا ئۆجالانی کرد و وتی: وەک دایکی شەهیدان و دایکی کورد داوای مافی خۆمان دەکەین، وڵاتێک کە دەمانەوێت بە ئارامی تێیدا بژین، ئێمە ئاشتی و برایەتی و یەکسانیمان دەوێت، با دەستی یەکتر بگرین و تورکیایەکی نوێ بنیات بنێین، چونکە هەرگیز نیشتمانی تورک بەبێ کورد دانامەزرێت، پێویستە دەوڵەتی تورک ئەمە باش بزانێت، دەوڵەتی تورکیا دەڵێ، پێویستە ئەمڕۆ یەکسانی دروست بکەین و سیاسەت بکەین، پەکەکەش چەک دابنێت، لە لایەکی دیکەشەوە لە ناوچەی باکوور و ڕۆژهەڵاتی سووریا هێرش دەکات، هەرچەند تۆپباران بکەن، ئێمەی گەلی کورد بە پێی بیرۆکە و فەلسەفەی ڕێبەر ئاپۆ دەژین، هەرگیز دەستبەرداری خەبات و تێکۆشان نابین، ئێمە بە ڕێبەرمان دەڵێین تا یەک کورد مابێت لەسەر پێی خۆمان وەستاوین، لە ڕێگەی وتارەکەمانەوە بۆتان، پشتڕاستمان کردۆتەوە کە مافی خۆمان و کوردستانەکەمان و خوێنی منداڵەکانمان بەفیڕۆ نادەین، داوا لە دەوڵەتی تورکیا دەکەین کە بە شێوەیەکی مرۆڤایەتییانە دەستی بخاتە سەر سەر و چاوی ڕێبەرمان، بەڵام ئەگەر بە دوژمنانە بەردەوامبن لە پەیڕەوکردنی سیاسەتی پیس و هێرشکردن وەک ڕابردوو، پێتان دەڵێین نا، کورد هەیە و پێتان دەڵێین نا،ئێمە بە دڵێکی گەرمەوە لە باوەشی ڕێبەرمان دەگرین و هیوادارین ڕێبەرمان بەم زووانە ئازاد بێت و جارێکی دیکە لە ئازادیدا کۆببینەوە.

 'داواکاری ئێمە ئازادی فیزیکی ڕێبەر ئاپۆیە.

 

 هەروەها هەڤی سەید ڕایگەیاند به بینینی وێنەی ڕێبەری گەلی کورد عەبوڵا ئۆجالان زۆر دڵخۆش بووه و وتیشی: پەیامی ڕێبەر ئاپۆ بۆ ئێمە خوێندرایەوە و وێنەکەیمان بینی، به جۆش و خرۆش و مۆڕاڵێکی زۆر بەهێزەوە چاوەڕێی ئەم ڕۆژە بووین، کە وێنەکانی ڕێبەر ئاپۆم بینی زۆر سۆزدار بووم و فرمێسکم ڕشت، سەرسام بووم بەو وێنەیە، پەیامی ڕێبەر ئاپۆ بۆ ئێمە خوێندرایەوە کە داوای لە پەکەکە کرد چەک دابنێت، ڕاستە بۆ ئێمەی دایکی شەهیدان قورس بوو، بەڵام کە هاتین بۆ لێکدانەوەی قسەکانی ڕێبەرەکەمان، گوتمان ئەوە بڕیارێکی دروستی ڕێبەرەکەمانە و دەڵێین دروستە، ڕێبەرمان ئەو بڕیارەی داوە، ئێمە لە پاڵ بڕیارەکانی ڕێبەرەکەماندا وەستاوین، ڕێبەر ئاپۆ لە پەیامەکەیدا دەڵێت، پێویستە پارتی کرێکارانی کوردستان کۆنگرەی خۆی ببەستێت، بەڵام ئەو کۆنگرەیە بەبێ ڕێبەر ئاپۆ بەڕێوە ناچێت، پێویستە ڕێبەرمان ئازاد بێت و جێگەی خۆی لە کۆنگرەدا بگرێتەوە.