لە عێراق دوو خوشک کە هەوڵی خۆکوشتنیان دا لەسەر پردی جەدرییە لە بەغدا لەلایەن پۆلیسەوە ڕزگار کران، چالاکوانێکیش دەڵێت یاساکان لاوازن لە ئاست کێشەکانی ژنان.

 

غوفران ئەلڕازی

بەغدا- ڕووداوەکانی کوشتن و خۆکوشتنی ژنان بە کوشتن و خۆکوشتنی گوماناوییەوە لە جیهاندا ڕوودەدەن، لە عێراق دوو خوشک لەسەر پردی جەدرییە هەوڵی خۆکوشتنیان دا، بەڵام لەلایەن پۆلیسەوە ڕزگارکران، زانراوە لە ئێستا بارودۆخی ئەو دوو خوشکە باشە و لە شوێنێکی ئارامدا جێگیرکراون و هەموو پێداویستییەکانیان بۆ دابیندەکرێت.

 

"دوو خوشکەکە بەهۆی کێشەی خێزانیەوە هەوڵیان داوە کۆتایی بە ژیانیان بێنن"

چالاکوانێک کە نەیویست ناوی ئاشکرا بکرێت، بۆ ئاژانسی نوژنها دوا و وتی: ئەو دوو کچە گەنجەی ویستویانە خۆکوژی بکەن، خوشکی یەکن و تەمەنیان ٢٠ ساڵە، دانیشتووی شاری بەغدان، باس لەوەدەکرێت کە دوو خوشکەکە کێشەی خێزانییان هەبووە و هۆکار بووە هەوڵی خۆکوژی بدەن".

 

ئەو چالاکوانە جەختیکردەوە کە لایەنی پەیوەندیدار لە وەزارەتی ناوخۆ ئەرکی خۆیان جێبەجێدەکەن و پاڵنەرەکانی خۆکوشتنی ئەو دوو خوشکە دەخەنەڕوو تا ژنانی گەنجی دیکە خۆکوشتن وەک چارەسەری کێشەکانیان نەبینن و هەوڵی بۆ نەدەن.

 

"بە بەرچاومەوە دوو خوشکەکە خۆیان هەڵدایەوە ناو ئاوەوە"

شایەتحاڵێکی ڕووداوە، وەها باسی ڕووداوەکەی بۆ نوژنها کرد: "من لە نزیک ئەو شوێنە پیاسەم دەکرد کە دوو کچەکە وەستابوون، هەستم بە دۆخی خراپیان دەکرد و پێم وابوو پێویستیان بە یارمەتییە. کاتێک کەمێک لێیان نزیک بوومەوە، کچێک خۆی لە پردەکە فڕێدا و پاشان کچەکەی تر خۆی فڕێدا و دواتر خەڵکێکی زۆر کۆبوونەوە و پۆلیسی ناوچەکە لە مردن ڕزگاری کردن".

 

"یاسا بەرامبەر ئێشی ژنان لاوازە"

ڕێزان شێخ دلێر، سیاسەتمەدار و چالاکوانی مافەکانی ژنان، ئاماژەی بەوەدا ژنانی عێراق لە ژێر گوشاری گەورەی دەروونی و کۆمەڵگەیدا دەژین، " ئەم گوشارانە زیاتر دەگەڕێتەوە بۆ دابونەریت و باری خێڵەکی و بەهۆی لاوازی یاساکانەوە سەبارەت بەکێشەی ژنان ڕوودەدات، ئەم دۆخە ژنان بەرەو نائومێدی دەبات و زۆرێک لە ژنان ڕوو لە خۆکوشتن دەکەنەوە، یاسا لاوازە لە بەرامبەر ئەو ئازارانەی کە ژنان ڕووبەڕووی دەبنەوە. دەرکردنی یاسای توندوتیژی خێزانی یەکەم گرەنتییە کە خێزان و ژن و منداڵ دەتوانن ژیانێکی هاوسەنگ بژین".

 

ئەو چالاکوانە داوا لە ژنان دەکات خۆیان بەدووربگرن لە بیرۆکەی خۆکوشتن و بەردەوام بن لە داواکردنی مافە ڕەواکانیان.

 

ت.پ