ناوەندی هەواڵ

 

بڵاوبوونەوەی بەربڵاوی نەخۆشی ئیبۆلا لە کۆنگۆی دیموکرات و فراوانبوونی بۆ ئۆگاندا ترسەکان لە بڵاوبوونەوەی جۆری دەگمەنی بوندیبوگیۆ زیاتر دەکات، کە هیچ ڤاکسین و چارەسەرێکی پەسەندکراوی بۆ نییە.

 

درەنگانی ئێوارەی ٢٨ی حوزەیران، کۆنگۆی دیموکرات ڕایگەیاند، کە ژمارەی تووشبووانی ئیبۆلا بۆ هەزار و ٢٧٤ کەس بەرزبووەتەوە کە ٣٦٠ کەسیان گیانیان لەدەستداوە، لە دوایین ئامارەکاندا ئاماژەیە بۆ فراوانبوونی مەودای بڵاوبوونەوەی ڤایرۆسی ئیبۆلا لە ڕۆژهەڵاتی وڵاتەکە.

 

دوای ڕاگەیاندنی شەپۆلێکی نوێی ڤایرۆسی خوێنبەربوونی کوشندە لەلایەن دەسەڵاتدارانی تەندروستی لە ١٥ی ئایاردا دێت، کە لە سێ پارێزگای ئیتوری، کیڤۆی باکوور و کیڤۆی باشووردا بڵاوبووەتەوە. ئەم ناوچانە بە نزیکەی ١٥ ملیۆن کەسی تێدایە و ڕووبەڕووی ئاستەنگی و کێشەی ئەمنی دەبنەوە لە دەستڕاگەیشتن بە خزمەتگوزارییەکانی چاودێری تەندروستی.

 

بڵاوبوونەوەی ڤایرۆسەکە تەنها لە کۆماری کۆنگۆی دیموکراتیدا سنووردار نییە، بەگوێرەی ئاماری ڕێکخراوی تەندروستی جیهانی، وڵاتی دراوسێی ئۆگاندا، ٢٠ حاڵەتی تووشبوون بە ڤایرۆسی ئیبۆلا و دوو حاڵەتی گیانلەدەستدانی تۆمارکردووە، سەرەڕای ئەوەی پێشتر لەلایەن دەسەڵاتدارانی ئەوێوە دڵنیابوون لەوەی کە دۆخەکە لەژێر کۆنتڕۆڵدایە،  گواستنەوەی ڤایرۆسی ئیبۆلا لە سنوورەوە نیگەرانییەکان دەوروژێنێت سەبارەت بە بڵاوبوونەوەی فراوانتر لە ناوچەیەکدا کە بە جوڵەی زۆری دانیشتووان و لاوازی ژێرخانی چاودێری تەندروستی لە هەندێک بواردا تایبەتمەندە.

 

ڕاپۆرتە تەندروستییەکان ئاماژە بەوە دەکەن، کە ئەو جۆرەی لە ئێستادا بڵاوبووەتەوە جۆری بوندیبوگیۆی ڤایرۆسی ئیبۆلایە، کە جۆرێکی دەگمەنەو لە ئێستادا هیچ ڤاکسین و چارەسەرێکی پەسەندکراوی بۆ نییە، ئەمەش هەوڵەکانی خۆپارێزی قورستر دەکات و جەخت لەسەر گرنگییەکی گرینگی ڕێوشوێنی دابڕان، شوێنپێهەڵگرتنی بەرکەوتن و پراکتیزەکردنی پارێزراو دەکاتەوە لە مامەڵەکردن لەگەڵ نەخۆشەکان و زیانبەرکەوتووان.