قامیشلۆ– بانگهێشتی کۆمیتەی پەیوەندییە سیاسییە دیموکراتییەکان و هاوپەیمانێتییەکان بۆ کۆنگرەی ستار لە دوای ڕووخانی ڕژێمی بەعس لە ٢٧ ی تشرینی دووەمی ٢٠٢٤، بۆ ڕێکخراو و بزووتنەوەکانی ژنان لە ڕۆژهەڵاتی ناوەڕاست و سەرانسەری جیهان بایەخێکی زۆری بەخۆیەوە بینیوە.

 

تا ئێستا ٩ وەفدی ژنان لە ئیتاڵیاوە گەیشتوون، دووانیان لە ئینگلتەرا، کەتەلۆنیا، ئەمریکا، ئەڵمانیا، ئەمریکای لاتین و نەمسا کە دەیان ژنانی چالاکوان، نووسەر، ڕۆژنامەنووس، ڕۆشنبیر، سیاسەتمەدار، هونەرمەند و ئەوانی دیکەیان تێدایە.

 

ڕۆژی هەینی ٤ ی نیسان ،وەفدێکی ژنانی نەمسا کە پێکهاتبوون لە ئەکادیمیست ،ڕۆژنامەنووس، نووسەر، سیاسەتمەدار سەردانی دامەزراوەکانی ژنان لە ناوچەکانی باکوور و ڕۆژهەڵاتی سووریایان کرد، بە سەرپەرشتی کۆنگرەی ستار بۆ زانینینیان ، ئامانجەکانی ، ئەندامەکانی چۆنخۆیان ڕێکدەخەن.

 

ژیان حوسێن ڕێکخەری کۆنگرەی ستاری ڕۆژئاوا، نەورۆز خەلیل ئەندامی بەڕێوەبەری کۆنگرەی ستار لە قامیشلۆ پێشوازییان لێکرا ،وەفدەکەیان ناساند، بە وردی یاساکانی کۆنگرەی ستار و کاری خۆیان،شۆڕشی ژنان لە ڕۆژئاوایان ڕوون کردەوە.

 

لەنێو ئەو پرسانەی کە سەرنجی وەفدەکەی ڕاکێشا و پرسیاری بۆ دروستکرد، یاسای ڕێوشوێنی کۆنگرەی ستار و چۆنیەتی ڕێکخستنی ژنان و سیستەمی هاوسەرۆکایەتی، ئابووری ژنان ، سیستمی پاراستنی ژنان لە باکوور و ڕۆژهەڵاتی سووریا، یاسای خێزان، چۆنیەتی بەڕێوەبردنی سیستەمی پەروەردە و لە کۆتایی کۆبوونەوەکەدا پرسیارێک سەبارەت بە ڕۆڵی ژنان لە داهاتووی سووریا و ڕادەی بەشداربوونیان لەو ڕێککەوتننامانەی کە واژۆ دەکرێن،هەروەها سەرنج ڕاکێشرا بۆ ئەو ڕێککەوتننامه یەی واژە کراوە لەلایەن مەزڵوم عەبدی فەرماندەی هێزەکانی سووریای دیموکرات  و ئەحمەد شەرع(جولانی) سەرۆکی حکومەتی کاتی لە ناوچەکانی ئیدارەی خۆبەڕێوەبەری سووریادا.

 

" خەباتی هەردوو ڕەگەز بۆ دیموکراتی کۆمەڵگە و خێزان گرنگە "

 

ژیان حوسێن ڕێکخەری کۆنگرەی ستاری رۆژئاوا لە پەراوێزی سەردان و کۆبوونەوەکەدا وتی:"ئامانجمان لەم بانگهێشتنامەیە ئەوەیە کە ژنان بێن بۆ رۆژئاوا ،زیاتر فێری شۆڕشی ژنان و دەستکەوتەکانی، چۆنیەتی بنیاتنانی سیستەمی دیموکراتی و ڕۆڵی ژنان لە بڕیارداندا بن.

 

ئەوەی زیاتر سەرنجی وەفدەکەی ڕاکێشا سیستمی هاوسەرۆکایەتیە، کە یەکێک لە دەستکەوتەکانی شۆڕشە ،لەلایەکی تریشەوە ڕۆڵی پاراستنی ژنان  ئەنجوومەنی دادپەروەری ژنان و جێبەجێکردنی یاساکانی خێزان و چۆنیەتی دامەزراندنی ئەم سیستەمە، سەبارەت بە مافەکانی پیاوان ئاماژەمان بەوەدا کە" بۆ بنیاتنانی خێزان و کۆمەڵگەیەکی دیموکراتی دەبێت خەباتی دوولایەنە هەبێت و ژنان و پیاوان پێکەوە پەروەردە بکرێن."

 

سەرەڕای ئاستەنگی زۆر، تێکۆشان بۆ بنیاتنانی یەکێتی بۆ ژنانی سووریا بەردەوامە

ژیان حوسێن وتی:"کاتێک هەتەشە هاتە سەر دەسەڵات ویستی ڕوخساری میهرەبانی خۆی نیشانی جیهان و گەلی سووریا بدات، بەڵام ڕۆژ لەدوای ڕۆژ سیاسەتی خۆی ڕوون دەبووەوە، کە هێرشی کردە سەر کەناراوەکانی سووریا و کۆمەڵکوژی دژی ژنان و عەلەوییەکان ئەنجامدا."

 

وتیشی:" کە بیروباوەڕی کۆمیسیۆن بەرامبەر بە ژنان زۆر ڕەقە و قبووڵیان ناکات، ئێمەش دەستووری سووریا قبوڵ ناکەین، چونکە نوێنەرایەتی ژنان و مافەکانیان ناکات ،ئێمە ڕەخنە لە هەر دەستوورێک دەگرین کە مافەکانی ژنان مسۆگەر نەکات، ئامانجمان لە خەباتی ئەمڕۆماندا ئەوەیە بتوانین سووریایەکی دێموکراتی و لامەرکەزی و فرەلایەن بنیات بنێین کە مافی ژنان تێیدا دەستەبەر بکرێت، بە دەسەڵاتی ژنان پارێزراو بێت ئەمە ئەو سووریایەیە کە دەمانەوێت بە یەکڕیزیی ژنانی سووریا بنیات بنێین، بۆیە داوا لە ژنان دەکەین ئاستی خەبات بەرز بکەنەوە، چونکە بنیاتنانی یەکڕیزی ژنانی سووریا گەرەنتییەکە بۆ یەکڕیزی گەلی سووریا."

 

ژیان حوسێن ئاماژەی بەوەدا کە سەردانەکانی وەفدی ژنان بەردەوامە، بۆ ئەوەی سوود لە ئەزموونی یەکتر وەربگرین پێشوازی لە هەر وەفدێک دەکەین، دەستکەوتەکانی شۆڕشەکەمان دەپارێزین و هاوبەشی دەکەین.