سلێمانی

 

ئێوارەی دوێنێ، ڕێکخراوی گەشەپێدانی مەدەنییەت لە ئۆفیسی ڕێکخراوەکەیان لە شاری سلێمانی، کۆڕێکی بۆ نەجات بیلکاسم، وەزیری پێشووی خوێندنی باڵای فەرەنسا و وتەبێژی پێشووی حکومەتی فەرەنسا ڕێکخست، سەبارەت بە ئازادیی ڕادەبڕین و کاری ڕێکحراوەیی، لە کۆڕەکەدا نەوێنەری ڕێکخراوەکانی ژنان و چالاکوانانی مەدەنی بەشداربوون.

 

نەجات بیلکاسم لە گفتوگۆیەکیدا باسی لەوەکرد کە بۆ باشتر بەڕێوەبردنی وڵاتێک پێویستی بە سیاسەت هەیە، "من وەزیری مافی ژنان بووم یاسام دەهێنایە پێشەوە، دامەزراوە و ڕێکخراوە مەدەنییەکان یارمەتییان دەدام، بۆ نموونە یاسایەکم پێشنیارکرد، ئەو پیاوانەی زوڵمیان لە ژنان دەکرد، پیاوەکان لە ماڵ دەربکرێن نەک ژنان”.

 

نەجات بیلکاسم باسی لەوەکرد بە هەماهەنگی کارکردنی نێوان ڕێکخراوەکان و حکومەتدا دەتوانرێت ڕێگری بکرێت لە کێشەکانی کۆمەڵگە و بەتایبەت توندوتیژییەکانی سەر ژنان، دەشڵێت: لە فەڕەنسا زۆربەی کات پیاوان دەچوون بە پارە کاتیان بەسەردەبرد لە گەڵ ژنان، وامکرد ئەوە کەم ببێتەوە، ئەوە بەهاوکاریی لەگەڵ ڕێکخراوە مەدەنییەکان بوو، دەمەوێت پێتان بڵێم ئێوە سوودتان هەیە بۆ کۆمەڵگە و داکۆکیکردن لە مافەکانی کۆمەڵگە، پێویستە حکومەتیش بۆ ئەمە هەماهەنگی ڕێکخراوەکان بێت.

 

نەجات بیلکاس، دەشڵێت: زوو زوو پێم دەڵێن، نابێت ڕێکخراوەکان تێکەڵی سیاسەت ببن، بەڵام  من دژی ئەو بۆچوونەم، دەبێت ڕێکخراوەکان تێکەڵ بە بابەتە کۆمەڵایەتیی و سیاسییەکان ببن، من سەرۆکی ڕێکخراوی وەنم، بەمزووانە پڕۆژەیەکمان هەیە بۆ کەمکردنەوەی هەژاری، دواتریش تێ دەگەن ڕێکخراو و دامەزراوەی مەدەنیی چۆن پەیوەندی بە سیاسەتەوە هەیە.

 

لە کۆتایدا بەشداربووانی کۆڕەکە گفتوگۆیان لە بارەی کێشە و کاری ڕێکخراوەکان کرد.

 

ت.پ