ناوەندی هەواڵ

 

ماوەی چەند ڕۆژێکە شەپۆلێکی خۆڵبارینی چڕ هەرێمی کوردستانی گرتوەتەوە و کێشەی تەندروستی بۆ هاوڵاتیان درووستکردووە، بەتایبەتی هەڵمژینی خۆڵ و تۆز بۆ ئەو کەسانەی کێشەی هەناسەتەنگییان هەیە.

 

ناوەڕۆکی بڵاوکراوەکە باس لە کاریگەرییەکانی خۆڵبارین دەکات بۆ سەر تەندروستی مرۆڤ، لەگەڵ ئەو ڕێکار و خۆپارێزییانەی کە پێویستە هاوڵاتیان بیگرنەبەر لە دەرەوە و لە ماڵەوە بۆئەوەی بە دووربن لە زیانەکان.

 

خۆڵبارین لە چەندین ڕوەوە کاریگەری دەکاتە سەر تەندروستی هاوڵاتیان

١- دەبێتە ھۆی ھەستیاری و وا دەکات پێڵووی چاوەکان سورببنەوە و توشی خوران ببن.

٢- ھەستیاری لوت و بەتایبەت تر ناوپۆشی لوت سور دەبێتەوە تووشی ھەوکردن دەبێتەوە بەمەش گیرانی لوت دروست دەبێت و کەسەکە تووشی تەنگەنەفەسی دەبێت.

 ٣- فشاری خوێن و خوێن بەربوون و ھەوکردنی گوێچکەی ناوەڕاست زۆر جار دەرئەنجامی ئەم خۆڵبارینەیە و ئەوەش کاریگەری دروست دەکات لەسەر ئەو کەسانە.

٤- ئەو کەسانەی تەنگە نەفەسن و ڕەبۆیان ھەیە لەگەڵ ئەم خۆڵبارینە حاڵەت و نیشانەکانیان زیاد دەکات

٥- زۆر جار دەبێتەھۆی خورانی پێست و سوربوونەوە و نەخۆشی ئێکزیما.

٦- کاریگەری لەسەر کۆئەندامی ھەناسەدان و سییەکان دروست دەکات و بەمەش کەسەکە تووشی کۆکە و پژمین و ناڕەحەتی زۆر دەبێت چونکە ئەو دەنکۆڵانە ھەڵگری میکرۆب و بەکتریان.

 

 چەندین ڕێگای خۆپارێزی ھەیە کە پێویستە ھاوڵاتیان پابەندی چەند ڕێنمایی بن لە ماڵەوە

١- داخستنی دەرگا و پەنجەرە و پاککردنەوەی شوێنی خۆڵبارین بە تایبەت بۆ ئەو کەسانەی لە ماڵەوەن.

٢- لە کاتی چونە دەرەوە دەمامک ببەسترێت و ڕوو پۆشی خۆت و شوێنی مانەوە بکەی بەبەردەوامی.

. ٣- دەرگا و پەنجەرە دابخە ئەگەر بۆ حاڵەتی زۆر پێویست نەبێت مەچۆ دەرەوە

٤- زۆر خواردنەوەی شلەمەنی بەتایبەت لەکاتی شۆفێری و چونە دەرەوە ھەوڵبدرێت ھەوای ناو ئۆتۆمبێل بکرێتەوە

٥- خواردنی میوە و سەوزە بەبەردەوامی.

٦- تێکەڵ نەبوونی ھاوڵاتیان و مامەڵە نەکردنیان لەگەڵ سەگ و پشیلە کە لە ئێستادا لەلایەن ھاوڵاتیانەوە گرنگی زۆری پێدەدرێت، چونکە ئەو تۆز و خۆڵە لەگەڵ فەرووی ئاژەڵەکان کێشە دروست دەکات.

٧- لە کاتی بوونی ھەر حاڵەتێکی نەخوازراو ھاوڵاتیان دەتوانن پەیوەندی بە ھێڵی گەرمی ژمارە ۱۲۲ بکەن.