کەزی و بسکی شۆڕە ژنە

بووە ڕەشماری نەیار تۆقێن

پێشەنگی جەنگی گرتە دەس

بە پۆستاڵ ڕەشان دەڵێ: بەس!

ژنە کوردە لە جەنگەی خەباتی چەکدار

بەردەبازی زۆردارانە

بۆ سەر قەڵای سەختی زۆردار!

 

لە ژوانگەی شەونخوونیدا وەدەرکەوت

بەرەو کێوی سەربڵندی وەسەرکەوت

بۆ غیرەت پێدانی لاوان

لاواندنەوەی ئاواتی جوانەمەرگان

وتی: من ژنە پێشمەرگەم …. پێشمەرگەی ژن

دەشێوێنم نەخشەی دوژمن

 

هاتومەتە لانکەی ویژدان

بۆ دیارکردنی ناونیشان …. نەک بۆ گیرفان

با ببمە قۆچی قوربانی و

گەلم شادبێ بە ئازادی و جوانی ژیان!

ببمە هێما بۆ نازینی ڕۆڵەکانم .. نەوەکانم

وڵاتە بێ ئاڵایەکەی کوردستانم!