ناوەندی هەواڵ

 

 مەرزیە فەریقی، ناوی تەواوی مەرزیە شەھاب عەبدوڵایە، لە ٢٢ی ئایاری ساڵی ١٩٥٨ لە مەریوانی رۆژھەڵاتی کوردستان لەدایکبووە، خوێندنی سەرەتایی و ناوەندیی لە مەریوان تەواوکردووە، کۆتایی ساڵانی ١٩٧٠ چووەتە شاری سنە و خوێندنی تەواوکردووە و بووە بە مامۆستا، پاشان ساڵی ١٩٧٨ لەگەڵ ھونەرمەندی ناسراوی کورد ناسڕی رەزازی هاوسەرگیرییان کردووە.

 

لە چیاکانەوە هونەری کردە بەرخۆدان

مەرزیە لەگەڵ هاوژینەکەی بەھۆی بارودۆخی ژیان و سیاسی، رۆژھەڵاتی کوردستان جێدەھێڵن و روودەکەنە چیاکانی کوردستان و دەبنە پێشمەرگە، لە ژیانی پێشمەرگایەتییەوە ئەزموونی هونەریی مەرزیە دەستپێدەکات و بە گۆرانییی "ئەی ھەڤاڵی پێشمەرگە" پێشمەرگەی هاندا، پاشان ساڵی ١٩٨٥ لە چیاکانی کوردستانەوە روودەکاتە وڵاتی سوید و ژیانێکی دوورە وڵاتی لەگەڵ ھاوسەرێکی پڕ ئەوین و منداڵەکانی بەناوەکانی "دڵنیا، ماردین، کاردۆ" بەسەردەبات.

 

مەرزیە پێشتریش لە چالاکی خوێندنگەکان و هەروەها لە ساڵی  ١٩٧٧ لە قۆناغەکانی خوێندنی مامۆستاییدا لەگەڵ کۆڕی موزیکی رادیۆی سنە، چەندین جار لە سەر تەختی شانۆ گۆرانی وتووە.

 

دوای چوونە سوید، لە ساڵی  ١٩٩٤بە تۆمارکردنی چەند بەرھەمێک لەگەڵ ناسر رەزازی ھاوژینیدا بە تەواوی تێکەڵ بە هونەرو گۆرانی بووە.

 

بۆ پرسی گەلی کورد سەردانی ڕێبەر عەبدوڵا ئۆجالانی کردووە

         

        

ژنە هونەرمەند و شۆڕشگێڕی کورد مەرزیە فەریقی، سەردانی چەندین سەرکردەی کوردی کردووە بە مەبەستی تاو و توێکردنی پرسی گەلی کورد، بەتایبەت هەردوو سەرکردەی دیاری کورد عەبدوڵا ئۆجەلان و جەلال تالەبانی، هاوکات جیاواز لە کاری هونەری، وەک ژنێک بۆ داکۆکی کردن لە مافی ژنان، لە چەندین کۆڕ و کۆبونەوەی ژنانی درەوەی وڵات چالاکانە بەشداری کردووە، هەروەها چەندین بەرهەمی هونەری تایبەتی بە ژنان تۆمارکردووە، یەکێکیش لەو  بەرهەمە دیارانەی تۆماری کردوە بە ناوی " لەو ڕۆژەوە " یە کە گوزارشت لە دۆخی ژنان و نەهامەتیەکانی ژنانی کورد دەکات لە کۆمەڵگەی کوردی.

 

لەو رۆژەوە لەو رۆژەوە

چـاوم بە دنیا هـەڵـێنا

دەردو پەژارە و کەسەرم

بۆ دایکی دامـاوم هـێنا

خەیاڵ و خۆشی مـنداڵیم هەر زوو خۆیان لێ تۆراندم

نەکەی نە چـی ئەتۆ کچی پەردەی گـوێیان پێ خـاراندم

ترس و دوو دڵی و بێ دەنگـی بوون بەهـاورێم بوون بە هـاورێم

لە تەوقی سوکی و نەنگی هـاتنە سەر رێم هاتنە سەر رێم

نەیان هێشت بە ویستی خۆم تاقە هەنگاوێک هـەڵێنم

تەنها جـارێک بە ئازادی رازی دڵـم بدرکێنم

فێریان کردم فرمێسکەکان لە لاپەسی وان هـەڵرێژم

پێکەنین و زەردەخەنە بە پەنجەکانم بنێژم

کە گـەورەبووم خـەمەکانم خـەمی دیکەیان هاتە سەر

خۆری ئەوینێکی پیرۆز لە تامی دەمـم هاتە دەر

لەو رۆژەوە هـەستەکانم ئاوێزەی خۆشەویستیە

بەهـیوای لە ئامێزنانی کۆرپەی راسـتی و سەربەسـتیە

 

بەھۆی ھەڵەی پزیشکییەوە، لەکاتی نەشتەرگەرییەکدا لە ١٨ی ئەیلوولی ٢٠٠٥، لە نەخۆشخانەی کارولینسکای ستۆکهۆڵمی پایتەختی وڵاتی سوید، کۆچی دوایی کرد.