تەرزە تەها

سلێمانی- تا ئێستا لە کۆی دوو هەزار و ٥٦٠ کاندید بۆ هەڵبژاردنی پێشوەختەی ئەنجومەنی نوێنەرانی عێراق دیاریکراون، لەو ڕێژەیەش ٩٦٣ کاندیدیان ژنن، کە دەکاتە ٢٧.٣٣٪، بەپێی یاسای هەڵبژاردنیش دەبێت ڕێژەی بەشداری ژنان لە ئەنجومەنی نوێنەرانی عێراق ٢٥٪ کەمتر نەبێت و لە هەر بازنەیەکیشدا بەهەمان شێوە ٢٥٪ کەمتر نەبێت.

 

بۆ جێبەجێکردنی ئەو یاسایە زۆرینەی حزبەکان کاندیدیان هەیە، لە هەرێمی کوردستانیش ٤٩ کاندیدی ژن بۆ هەڵبژاردنەکان لەلایەن پارتە جیاوازەکانەوە دیاریکراون کە هەرژنێکیان ڕای جیاوازییان هەیە، دەیانەوێت بە شێوەی جیاواز کار بۆ پێشکەوتنی ژنان بکەن.

نەرمین مەعروف، کاندیدی داهاتوو لە هاوپەیمانی نێوان بزووتنەوەی گۆڕان و یەکێتیی نیشتیمانی کوردستان لە بازنەی یەکی سلێمانی باس لەوەدەکات، هاوپەیمانیەتییەکە لەسەر کۆمەڵێک بنەما و پێوەر بەربژێرە ژنەکانی دیاریکردووە، لە هاوپەیمانیەتییەکەشدا ئەو وەک شارەزاییەک لە بواری ئابوری و پسپۆڕی بودجە دیاریکراوە، لەبەر ئەوەی لە بودجەدا ماف و شایستە داراییەکانی هەرێمی کوردستان دەپارێزرێت.

 

نەرمین مەعروف دڵنیایی دەدات لەوەی کە ژنان دەتوانن دەنگی هاوڵاتیان بەدەستبهێنن و وتی:" لەبەرئەوەی ئێستا کۆمەڵگای کوردی قۆناغی جیاکاری جێندەری تێپەڕاندووە، تاکەکان لەسەر بنەمای توانا و لێهاتوویی دەتوانن خۆیان بسەلمێنن نەک جیاوازی ڕەگەزی، دەرفەتەکانیش بۆ هەردوو ڕەگەز کراوەیە، ئومێدم بە سەرکەوتنی ژنان هەیە".

 

شنۆ نوری یەکێکی ترە لە کاندیدە ژنەکان کە لە بازنەی دووی باشوری سلێمانی-ە، لە لێدوانێکدا بۆ ژنها ئاماژەی بۆ ئەوەکرد، لەکاتی دیاریکردنی بەربژێرەکاندا پێوەرەکان دیاریکراوبووە، لەوانە دەبێت بەربژێرەکە لە خێزانێکی کورد پەروەربێت، ڕابردوویەکی پاکی هەبێت، زمانی عەرەبی بزانێت، شارەزایی لە یاسا و مافی نەتەوەیی هەبێت.

 

شنۆ نوری بەدەر لەوەی بەرپرسی کارگێڕییە، پێشتربەرپرسی یەکێتی ئافرەتان بووە، پێیوایە کە کاری پێشوو پشتگیری دەکات بۆ ئەوەی بزاندرێت لە داهاتوودا دەتوانێت چی بکات، لەبەرئەوەی لە پێشتریشدا داکۆیکاری مافی ژنان بووە، ئەگەر ببێتە ئەندامی ئەنجومەنی نوێنەرانی عێراق، ئەوا داکۆکی لە مافی ژنان دەکات و دەڵیت "ئەگەر خوا یارمەتیم بدات بەو ئەرکە بگەم، ئەوا پشتگیری تەواو لە ژن دەکەم، حەزدەکەم ژن ئابوری سەربەخۆی خۆی هەبێت، ژن کیانی خۆی هەبێت، ئەگەر ژن تەندروست هەبێت، ئێمە دەتوانین خێزانێکی تەندروستمان هەبێت، سەرکەوتنی خێزان و کۆمەڵگا لە سەرکەوتنی ژنانەوەیە".

 

سروە محەمەد، کاندیدی داهاتوو لە بازنەی پێنجی گەرمیان بە گرنگیەکی تەواوی دەزانێت کە ژنان لە پڕۆسەی هەڵبژاردندا بەشداری بکەن، لەبەرئەوەی ژنان لە ڕێگای بەشداریکردنیان لە هەڵبژاردنەکان و پڕۆسەی سیاسی دەتوانن بەشداری لە بڕیارەکان و یاساکان و بەڕێوەبردنی وڵاتدا بکەن.

 

سروە محەمەد سەرباری ئەوەی کاندیدی داهاتووە بۆ هەڵبژاردنی پێشوەختەی ئەنجومەنی نوێنەرانی عێراق، هاوکات چالاکوانێکی بواری ژنان و دۆزی ئەنفالە، باس لەوەدەکات ئەگەر ژنان ببنە ئەندامی ئەنجومەنی نوێنەران ئەوا خۆیان دەتوانن مافەکانی خۆیان دیاریبکەن.

 

لەبارەی سیستمی کۆتاوە، سروە محەمەد پێیوایە کە سیستمی کۆتا هاوکاری ژنانە تا بتوانن بەشداری سیاسەت بکەن و دەستەبەری بەشێک لە مافەکانی ژنان بکەن، بەڵام ژنان لەم کاتەدا دوو ئەرکیان لەسەرشانە، جگە لەوەی وەک ئەندامی ئەنجومەن ئەرکی هەیە، دەنگو ڕەنگی ژنانیشە لەو شوێنەی کاری تێدا دەکات.