شنیار بایز

 

سلێمانی- ماوەی دوو مانگە بایکۆتی مامۆستایان دەستی پێکردووە و تا ئێستاش بەردەوامە، دەبوو بە ناڕەزایەتی و بایکۆتی مامۆستایان حکومەت بێتە دەنگ، بەڵام تا ئێستا بێ هەڵوێستە، ئەمەش وایکرد جگە لە مامۆستایان، خوێندکارانی پۆلی دوازدەی ئامادەیی، بەهۆی کەمی کاتی خوێندن و زۆری بابەتەکانیانەوە دەست بە ناڕەزایەتی و بایکۆتی هۆڵەکانی خوێندن بکەن، ئەمە سەرەڕای دۆخی فەرمانبەرانی فەرمانگەکان و لاوازی بازاڕ و قەیرانی ئابووری کە کاریگەری لەسەر هەموو تاکەکانی کۆمەڵگە کردووە.

 

"لە بەرابەر ئەرکدا پێویستە ماف بدرێت، بەڵام نادرێت بە مامۆستایان"

سازە عەبدوڵا، مامۆستا و چالاکوان، دەربارەی بایکۆتکردنی مامۆستایان و هۆکاری پشتی ئەم ناڕەزایەتیانە ڕوونیکردەوە، "هەرچینێک لە کۆمەڵگەدا ئەرکی هەبێت، دەبێت مافیشی هەبێت، کاتێک مامۆستایان داوای مافەکانیان دەکەن، بێگومان لە بەرامبەر ئەرکەکانیان دایە، مامۆستایان چینێکی گرنگی کۆمەڵگەن و هەموو چینەکانی دیکە لەسەر دەستی مامۆستا گەشە دەکەن و پێدەگەن، بەڵام دەسەڵاتێکی بێ باک و بێ خەم مافی مامۆستایان نادەن".

 

ئاماژەی بەوەکرد، حکومەتی هەرێم لە ناوخۆدا کێشەی زۆری هەیە و لەگەڵ حکومەتی عێراقیشدا بەردەوام لە کێشەدایە، ئەوەی باجی دەرەنجامی کێشەی حکومەتی هەرێم و عێراق دەدات، چین و توێژی مووچەخۆران و مامۆستایانن، وتیشی: پێوستبوو سیاسەت تێکەڵ نەکرایە بە مافی هاوڵاتیان، بەڵام لە باشوور سیاسەتی حزبە دەسەڵاتدارەکان و عێراق تێکەڵکراوە و پەیوەستکراوە بە مافی فەرمانبەر و مامۆستایانەوە.

 

"حکومەت بێ باکە لە هەموو خەڵکی و لە خەمی هەژاراندا نییە"

سازە عەبدوڵا باسی لەوەشکرد، پێکهاتەی خەڵکی سلێمانی جیاوازە بۆیە کاتێک ناڕەزایەتی دەردەبڕن بە شێوازێکی جیاوازتر لە ناوچەکانی دیکە دەریدەبڕن، چونکە لە هەموو ناوچەیەک ناڕەزایەتی هەیە، ئەمە سیستمێکە کە لە بەرامبەر ئەرکدا ماف بدرێت بەڵام لەم هەرێمەدا ماف نادرێت، وتی : هەڵوێستی ئێستای مامۆستایان شۆڕشێکی سپیی دوور لە پشێوی نانەوەیە، هیوادارین بە ئامانج بگات.

 

ڕوونیشیکردەوە، سلێمانی بە جارێک لە چوار لاوە ئابڵوقەی لەسەرە، لە ڕووی ئابوورییەوە خەڵک دۆخی لە خراپیدایە و لەسەر هێڵی هەژاری دەژی، بەو ئاستەی چەندین کەس هەن کرێی خانوویان پێنادرێت، گومانی تێدا نییە ئەم دۆخەی لە شاری سلێمانیدا دروست بووە دەستێکی سیاسی لە پشتەوەیە، بەڵام بە ئیرادەی مووچەخۆران و خەڵکی دەتوانرێت کاریگەری ئەو دەستە سیاسیانە نەهێڵن، دەشڵێت: دەسەڵاتداران خەم سارد و بێ باکن، ئەمەش وایکردووە خەڵکی توڕەتر بێت، چونکە لە جیهاندا کاتێک خەڵکی ناڕەزایەتی دەردەبڕن، حکومەت دێتە جواب و بەشێک لە داواکارییەکانیان جێبەجێ دەکات، بەڵام لە باشوور حکومەت بێ دەنگە، بێ باکە لە خەڵکی و لە خەمی هەژاراندا نییە، بەڵکو پێشی خۆشە هەموو هاوڵاتیان نەخوێندەوار بن.

 

"حزبە دەسەڵاتدارەکان هەمیشە ئامانجیان پەرتەوازەییە"

سازە عەبدوڵای مامۆستا ئاماژەی بەوەدا، هاوڵاتیان لە زاری حکومەت خۆیەوە دەزانن بانقەکانیان پڕن لە داهاتی هاوڵاتیان و پارە، حکومەتێکی هەژار نین و دەتوانن کۆمەڵگە بەڕێوەببەن، هەرچەندە ئەم دەسەڵاتە بە دەنگی خەڵکی چوونەتە سەر حوکم و دەسەڵاتێکی کوردین، بەڵام هیچ لە خەمی نەتەوەکەی خۆیاندا نین، تەنها سەیرکەرن و داوای مامۆستایان و کەسانی ناڕازی جێبەجێ ناکەن.

 

دەڵێت: حزبە دەسەڵاتدارەکان خۆیان پەرتەوازەن و ئامانجیان پەرتەوازەکردنی خەڵکی و دەسەڵاتە، لەکاتێکدا دەبوو یەکگرتوو بوونایە لەسەر ماف و داواکارییەکانی خەڵکی، ماوەیەکی دیکە دووبارە هەڵبژاردنەکانە و ئەم بێ هەڵوێستیەی حکومەت پەکخستنی دیموکراتیە، بۆیە پێویستە دەسەڵاتداران بێنە دەنگ و چارەسەری کێشەی هاوڵاتیان و مووچەخۆران بکەن.

 

"منداڵی هەژارانن کە دەبنە زەرەرمەندی سەرەکی لەم دەوامنەکردنەدا"

لە درێژەی قسەکانیدا سازە عەبدوڵا ڕوونیکردەوە، کاری مامۆستایەتی وەک هیچ کارێکی دیکە نییە و پێویستی بە ئیرادە و هێزە، بەڵام حکومەت ئەو ئیرادەیەی لە مامۆستان زەوت کردووە، مامۆستایان گیرفانیان خاڵییە بەردەوام لە خەیاڵی دابینکردنی پێداویستیدان بۆ خێزان و منداڵەکانیان، بۆیە هەمیشە لە دوودڵیدان و ناتوانن بە ئاسودەیی وانە بڵێنەوە، بۆیە کاتێک کەسێک زوڵمی لێدەکرێت بێگومان ناتوانێت هەق بدات بە پیشەکەی.

 

ئەو مامۆستایە ئاماژەی بەوەشکرد، تا ئێستا دوو ئیدارەیی لە باشووری کوردستان پەیڕەو دەکرێت، سیاسەتی حکومەت وایکرد نەک تەنها مامۆستایان، بەڵکو خوێندکارانیش ڕژانە سەر سەقامەکان و داوای مافەکانی خۆیان دەکەن، چونکە لە خەمی داهاتووی خۆیاندان.

 

لە درێژەی قسەکانیشیدا وتی: ئێمە ئەجێندای گەورەمان هەبوو، دەبوو سنورەکەمان و سەروەری هەرێم پارێزراو بێت، کێشە سیاسی و نەتەوەییەکان چارەسەر بکرانایە، نەک بێینە سەر شەقام بۆ مووچە، شەرمە بۆ دەسەڵات خەڵکی بۆ مووچە بێنە سەر شەقام، بەڵکو دەبوو بۆ پاراستنی سنوری کوردستان و ڕاگرتنی درۆنەکان بهاتنایەتە سەر شەقام، دەسەڵات خەڵکیان بێ هێز و لاواز کردووە و وایکردووە پرسە نەتەوەیی و نیشتیمانییەکانیان بیرچێتەوە، کە ئەمەش بۆ خۆی دەستی داگیرکارە.

 

"حکومەت پێویستە دان بە بێتوانایی خۆیدا بنێت لە بەڕێوەبردنی هەرێمی کوردستان"

لە کۆتایدا وەک ڕێگە چارەسەریەک سازە عەبدوڵا وتیڵ حکومەتی هەرێمی کوردستان بەرپرسیارە و دەبێت بێتە ناو خەڵکییەوە، بۆ ئەوەی بزانێت داواکاریان چییە و هەوڵی چارەسەرکردنی بدەن، پلە بەرزکردنەوەی دووبارە دەستپێبکاتەوە، چونکە نایەکسانییە پلە باڵاکان پلەیان بەرز بکرێتەوە و مووچەیان زیاد بکات، بەڵام هەژاران پلەیان بەرز نەکرێتەوە، ئەگەر دەزانێت مووچەی پێنادرێت با دەستبەردار بێت، کێشەکە هاتووەتە ناو ماڵەکانەوە، دەبێت چارەسەری بکەن، ئەگەر پێیان چارەسەر ناکرێت، پێویستە چۆڵی بکەن و لە هەموو دنیاشدا بەو شێوەیەیە، حکومەتێک حکومەت بێت، دەبێت لە خەمی نەتەوەکەیدا بێت.