شنیار بایز

 

سلێمانی- داگیرکاری و تیرۆرکردنی کەسانی ئازادیخواز لە باشووری کوردستان زیاد دەکات، هۆکارەکەشی هاوکارییەکانیەتی لەناو دەسەڵاتی باشووری کوردستاندا کە ڕێگەیان بۆ کاری سیخوڕی و میتی تورک داوە هێرش و تیرۆر بۆ سەر ئازادیخوازان و خاکی باشووری کوردستان زیاد بکەن، لە بەرامبەر هێرشی داگیرکاری و کردەی تیرۆردا حکومەتی عێراق و هەرێمی کوردستان چاوپۆشیان کردووە و لەپێناو بەرژەوەندی سیاسی، ئابووری و بنەماڵەیی خۆیان بێدەنگیان هەڵبژاردووە.

 

"باشووری کوردستان لەژێر داگیرکاری قوڵدایە"

بێریڤان محەمەد، چالاکوان، دەربارەی داگیرکارییەکانی سەر باشووری کوردستان ئاماژەی بەوەدا باشوور بە بەراورد بە باکوور و پارچەکانی دیکەی کوردستان لە ژێر داگیرکاری زیاتردایە، بە جۆرێک هەمەلایەنەتر و بەرفراوانترە، هەرچەندە باشوور لە ساڵی ١٩٩١ ڕاپەڕینی کرد بۆ ئازادبوون بەڵام لە سایەی حزب و دەسەڵاتیکی تەسلیمکار و دەسەڵاتێک لەسەر بنەمای بنەماڵەیی پەیوەندییەکانی خۆی گرێدا بە داگیرکەرانەوە و وایکرد باشوور بکەوێتە ژێر هەڕەشەی زەقی داگیرکەرانەوە.

 

"بەتایبەت بۆ ئازادیخوازان، کە دەکەونە ژێر هەڕەشە و زیندانەوە، دەوڵەتی تورکیا لە بوارە جیاوازەکاندا پەرەی بە داگیرکاری داوە، لە بواری سەربازیدا چەندین شوێنی ستراتیژی باشووری کوردستانی داگیرکردووە، لە بواری سیخوڕیشدا بارەگاکانی جێگیرتر و زیاتر کردووە، جگە لەوە قەیرانەکانی ئابووری و پەروەردەیش کاریگەری داگیرکەرانە بەسەر باشووری کوردستانەوە".

 

"بە ڕێکەوتنی ناوخۆی و جیهانی هێرشی دەوڵەتی تورکیا بەردەوامی هەیە"

بێریڤان محەمەد باسی لەوەکرد، داگیرکاری بەرفراوانی باشووری کوردستان تەنها لەلایەن دەوڵەتی تورکیاوە جێبەجێ ناکرێت، بەڵکو لەلایەن ڕژێمی ئێرانیشەوەیە بوونی هەیە، وەک ماوەیەک بەر لە ئێستا هێرشیکردە سەر هێزە ئۆپۆزسیۆنەکانی خۆی کە لە خاکی باشووردا جێگیربوون، بەو هۆیەوە چەندین گوندی بۆردوومان کرد، وتیشی: ئەوەی جێگەی سەرنجە دەنگدانەوەی هێرشەکانی ڕژێمی ئێرانە لەگەڵ کاردانەوەکانی حکومەتی عێراق و کوردستان، کە سەرجەم حزب و لایەنە سیاسییەکان لێی هاتنە دەنگ، دەربارەی داگیرکارییەکان ئەمە خاڵێکی ئەرێنییە، بەڵام پێویستە بۆ داگیرکارییە بەردەوامەکانی دەوڵەتی تورکیش بێنە دەنگ لە کاتێکدا چەکی کیمیایی بەکاردەهێنێت و داگیرکاری توندتر دەکات.

 

ئەو چالاکوانە جەختیکردەوە لەسەر ئەوەی بێدەنگی لە ئاست هێرشەکانی سەر باشووری کوردستان دەیسەلمێنێت ڕێکەوتن لە ئاستی ناوخۆیی، عێراق و جیهان بەڕێودەچێت، کە ستەمێکی گەورەیە لە خەڵکی باشوور و کوردستان دەکرێت، تا بێت مەترسی زیاتر دروستدەکات، دەشڵێت: "تەنها ڕێگە چارەش شۆڕشە".

 

"دەوڵەتی تورکیا لە هەولێر دەڵێت کەسانی ئازادیخواز جێی ئامانجمانن"

لە درێژەی قسەکانیدا بێریڤان محەمەد ڕوونیکردوە کە تەنها لە ساڵی ڕابردوودا و لە سنوری پارێزگای سلێمانی چوار بۆ پێنج کەسی وڵاتپارێز و شۆڕشگێڕ، تیرۆرکراون، ئەمە جگە لە دەرەوەی شارەکان و ڕێگا سنورییەکان، هەرچەندە لە دوای ڕاپەڕین و ئازادکردنی باشووری کوردستان تیرۆرکردنی کەسانی ئازادیخواز بوونیان هەبووە، بەڵام ڕێژەکان بەو جۆرە نەبوون و ئێستا ڕوو لە هەڵکشانە، گوومانی تێدا نییە بێ ڕێکەوتن و پلان ئەم تیرۆرکردنانە ناکرێن.

 

هاتنی باڵیۆزی تورکیا بۆ هەولێر جێگەی پرسیارە

هاتنی باڵیۆزی دەوڵەتی تورکیا بۆ شاری هەولێر جێگای پرسیارە و بەتایبەت کە لە کۆنگرەیەکدا دان بە تیرۆرکردنی ناگیهان ئاکارسەلدا دەنێت و سەرۆکی دەزگای جاسوسی تورکیا-میت لە هەولێر کۆبوونەوەی لەگەڵ لایەنە جیاوازەکاندا ئەنجامدا، لەوبارەیەوە بێریڤان محەمەد وتی: بینینی هاکان فیدان بێگوومان بۆ ڕێککەوتن لەگەڵ حزبە دەسەڵاتدارەکاندا بووە، بەتایبەت پەدەکە و یەنەکە، ئەمەش دەرخەری ئەو ڕاستیەیە پەیامی میتی تورک بۆ تیرۆرکردنی کەسانی ئازادیخوازە بە پاڵپشتی حزبە دەسەڵاتدارەکانی باشوور".

 

"ئازادیخوازان و گەلی باشوور لە ژێر مەترسیدان"

بێریڤان محەمەد ئاماژەی بەوەشدا، هەر تاکێکی ئازادیخواز لە باشووری کوردستان لەبەردەم مەترسی تورکیا دایە، گرنگە هاوڵاتیانی بزانن دەسەڵات و حزبەکانی باشوور وایانکردووە باشوور ببێتە پەیڕەوکاری ویستی داگیرکاران، بە جۆرێک وەک شارێکی خۆی کار لە باشووردا دەکات، ئەگەر خەڵکی باشوور نەیەتە دەنگ و وەڵامی داگیرکارییەکان نەداتەوە گومانی تێدا نییە دۆخی باشوور هەنگاوی خراپتر دەنێت تا دەگاتە هەمان دۆخی حکومەتی بەعس کە کەس نەتوانێت ڕای ئازادی خۆی دەرببڕێت.

 

"تیرۆرکردن و داگیرکاری تێکۆشانی ئازادی ناوەستێنێت"

بێریڤان محەمەد، ئاماژەی بەوەشدا، ئەگەر دەوڵەتی تورکیا پێیوایە لە ڕێی داگیرکاری و تیرۆرکردنی کەسانی ئازادیخواز دەیەوێت هێزی ئازادیخوازی گەل لەناوببات، ئەوە بیرکردنەوەیەکی هەڵەیە، چونکە ئەگەر وابوایە سی ساڵ بەر لە ئێستا دەیتوانی لەناویببات، بەڵام بە پێچەوانەوە تا دێت فکر و شۆڕشی تێکۆشانی گەلی کورد تا دێت زیاد دەکات، نەک تەنها لەناو ناچێت بەڵکو تا بێت تەشەنە دەکات.

 

وتیشی: دەوڵەتی تورکیا بەهۆی ئەوەی لە قەیراندایە بەردەوام هێرش و داگیرکارییەکانی ئەنجام دەدات و دەیەوێت قەرەبووی شکستەکانی بکاتەوە، بەڵام دروشمی شۆڕش و ژن ژیان ئازادی بووەتە دروشمێکی جیهانی و تەواوی جیهان پاڵپشتی لێدەکات، ئەوەش دەیسەلمێنێت فکری شۆڕشی ئازادی تەواوی جیهانی گرتووەتەوە.

 

"هاوڵاتیانی باشوور لە شۆڕشی ئازادی گەل کۆدەبنەوە"

ئەو چالاکوانە، تیشیکدەخاتە سەر دەسەڵاتدارانی باشوور کە پێویستە بزانن گەلی کورد لەوەدایە کە دەسەڵاتدارانی بۆ دەربکەوێت، چونکە حزبە دەسەڵاتدار و کلاسیکەکان بەتایبەت پەدەکە نەیانتوانیوە وەڵامی داخوازییەکانی گەل بدەنەوە، بەمەش تا دێت هاوڵاتیانی باشوور لە دەوری شۆڕشی ئازادی گەل کۆدەبنەوە و داگیرکار پەنا بۆ تیرۆر دەبات بۆ ڕاوەستاندنیان، "هەربۆیە ناگیهان ئاکارسەل تیرۆرکرا چونکە چەندین ژنی هۆشیار کردبووەوە و ئاشنای کردبوون بە مێژوی گەل و شۆڕشی ژنی کورد، بەڵام ئەوەی گرنگە خەڵکی باشوور بیکات بێدەنگ نەبوونیانە، چاوەڕێ نەبن دەسەڵات و دەوڵەتانی دیکە پارێزگاریان لێبکەن، بەڵکو خۆیان شۆڕش ئەنجام بدەن، هەست بەوە بکەن داگیرکاری لەسەر کەسایەتی، ماڵ و ژیانیانە".