لە رابردوودا کورد قوربانیی گەورەی دەدا تا لە میدیا نهێنی و ناراستەوخۆکانیدا باس لە پرسی پیرۆزی نەتەوەکەی بکات، کەچی دوای (35) ساڵ لە هەرێمێکی نیمچە ئازادکراودا، ئەم پرسە نەک پاشەکشەی کردووە، بگرە میدیای کوردی بۆتە دەروازە و رێنیشاندەر بۆ نەیاران دژی نەتەوەکەی؟ ئەمە رەخنەیەکی جددییە و پێویستە لە هۆکار و لێکەوتەکانی بکۆڵدرێتەوە، ئایا کورد بۆتە خاوەن هەرێمێکی فیدراڵی سەقامگیر و ئەجندای سەرجەم داخوازییەکانی بەدیهێناوە تا بەوجۆرە پرسی نەتەوە و نیشتمان لەلای کاڵ بێتەوە، یان سەقفی داواکارییەکانی دابەزاندووە بۆیە میدیاکان رۆژانە و بێ باکانە جۆرەها زانیاریی هەستیار، یان ئاماژەدان و لێکدانەوە و شیکردنەوە سەبارەت بە زۆر دۆسێی گرنگی هەرێم، تا ئاستی لە دەستدان و لە قاڵبدان وهەڵوەشانەوەی قەوارەی هەرێم دەخەنە بەردەست حکومەتی ناوەند و وڵاتانی ناوچەکە؟

لە راستیدا میدیای حزبەکان بەتایبەتیش تیڤی و سۆشیال میدیا سێبەرەکانیان بکەری سەرەکیی ئەم دیاردەیەن و بە هەر دوو ئاراستەی ناوخۆیی و دەرەکی، دوور لە ئیتیکی رۆژنامەوانی بەم ئەرکە هەڵدەستن و لە رێگەی بڵاوکردنەوەی هەواڵ و راپۆرت و ریل، یان بە هۆی چاوپێکەوتن لەگەڵ هەندێ شرۆڤەکار جۆرەها کارتی فشار دەخەنە بەردەست نەیارانی کورد، لە ناوخۆی هەرێمیشدا ئەوە هەر میدیاکانن، کە کۆمەڵگەیان دووچاری دابەشبوون و رق و کینە کردووە و وەلائی تاکیان بۆ نەتەوە و نیشتمان لاواز کردووە، بەپێچەوانەشەوە کاتێ حزب و پلاتفۆرمەکانیان لەبارەی پرسێکەوە کۆک دەبن، ئەو کات نەیارانی کورد هێزی نەتەوەیەکی بێ دەوڵەتی هەشتا ملیۆنی دەبینن و تێدەگەن، گەر ناپاکی لێ دەرچێت هەرگیز ناتوانن درز بخەنە نێوانیانەوە، مەبەستم لەو خۆپیشاندانە کۆدەنگییەیە، کە خۆرسکانە بۆ پاڵپشتی لە هاونیشتمانیانی رۆژئاڤا بەرپاکرا، حزب و میدیاکانیان هەڵسوڕێنەری نەبوون، بەڵام دژیشی نەبوون، بۆیە کورد پێکەوە جوانترین تابلۆیان پیشانی دوژمنان دا.

ئەم دەرئەنجامانە دەمانگەیەنێتە ئەو بروایەی، کە کورد میدیای لە بەشێک لە خەسڵەتە راستەقینەکانی داماڵیوە، رۆژانە سەنگەرگرتن لە یەکتر و وەڵامدانەوەی یەکتر و پەردەلادان لەسەر رابردووی یەکتر و هەڵدانەوەی نهێنی و خستنەڕووی ناکۆکییەکان و بەردەوام دووبارەکردنەوەی لاوازبوون و لەقاڵبدان و لەناوچوونی هەرێم و خستنەڕووی بێ باکی هاووڵاتییان لە هەڵوەشاندنەوەی قەوارەی هەرێم، کاردانەوەی تا ئەوپەڕی خراپی لەلای چین و توێژە جیاوازەکان دروستکردووە، لەولاشەوە هۆکارێک بووە بۆ لاوازبوونی قەوارەی هەرێم لە عیراقدا.

بێگومان هەموو ئەمانەش رەنگدانەوەی ناکۆکی حزبەکانە، کە هەرێمی کوردستانی بەم چارەنووسە گەیاندووە، نەبوونی ئەجیندای یەکگرتووی نیشتمانی و خراپی و جیاوازیی لە گوتاری سیاسی و نەبوونی هێڵی سوور بۆ پرسە هەستیارەکان و هێنانی ژمارەیەکی زۆر لە شرۆڤەکارانی سیاسی بۆ سەر شاشەی کەناڵەکان لە رەوشە جیاوازەکانی هەڵبژاردن، ریفراندۆم، جەنگ، نەبوونی موچە و بودجە، دۆسێی ناوچە جێناکۆکەکان و پێشمەرگە و نەوت، بەمەبەستی کێبرکێ لە شیکردنەوە و لێکدانەوەی رووداوەکان بە ئاراستەی بەرژەوەندیی حزب و پروپاگەندەکردن بۆ حزب و ئاوەژووکردنەوەی راستیی رووداوەکان و درکاندنی زانیاریی هەستییار لەژێر ناوی گرەوکردن لەبارەی واقعیبونی شرۆڤەکان، کە زۆرجار ئەم دەرئەنجامانە دەمانگەێنێتە ئەو بڕوایەی بپرسین ئایا هەرێمی کوردستان لە هەسارەیەکی ترە و هەرگیز حکومەت و حزبە عیراقی و ئیقلیمییەکان ناوەندێکیان بۆ مۆنیتەرینگی هەواڵ و سیاسەت و شرۆڤەکان نییە؟

لێرەدا هەرگیز مەبەست ئەوە نییە، کە میدیای کوردی خۆی لە باسکردنی کێشە لادا، بەپێچەوانەوە ئاشکراکردنی نادادی و داکۆکیکردن لە مافی هاووڵاتی و شیکردنەوە و لێکدانەوەی دروست و بەڵگەدار بۆ دۆخە جیاوازەکان ئەرکی سەرەکیی میدیایە، بەڵام ئەوکاتەی کەناڵی راگەیاندن واز لە کاری پیشەیی و بەرپرسیارێتی گەیاندنی هەواڵ و زانیاریی پشتبەستوو بە سەرچاوە و شیکردنەوەی واقیعی و ئەکادیمی دەهێنێ، ئەوکاتەی میدیاکان هەمووان دەبنە دەمڕاستی حزبەکان و مەودایەک بۆ میدیای نیشتمانی نامێنێ، ئەوا میدیا دەبێتە پلاتفۆرمێک بۆ ململانێ و دەستشکاندنەوە وهۆکاردەبیت بۆ لەباربردنی سەقامگیری و لەبەریەکهەڵوەشاندنی کۆمەڵگە و لاوازبوونی وەلائی هاووڵاتی بۆ نەتەوە و نیشتمان، هەربۆیە لە ئێستادا زۆر پێویستە چاوێ بە پرۆگرام و پرنسیپ و ئەجیندا و ئامانجی دەزگاکانی راگەیاندندا بخشێنرێتەوە، چونکە بەو هۆیەوە کۆمەڵگە چەندین ساڵە لە گرێژنە دەرچووە.