هەرێمی كوردستان له‌ژێر "پۆستاڵی دیموكراسی"دا
نیاز عه‌بدوڵا – ڕۆژنامەنووس و چالاکوان
هێرشەكانی رژێمی ئیسلامی ئێران لە رێگای درۆنی بۆمبڕێژكراو و موشەكه‌وه بۆسەر كۆیە و زڕگوێز و پردێ، زیاتر لە ١٠ شەهید و ٥٠ برینداری لێكەوتەوە. لەناو شەهیدەكانی كۆیە دا رەیحان كەنعانی دایك هەیە، كە بەهۆی سەختی برینەكەیەوە تەنیا تواندرا منداڵە كۆرپەكەی بە دونیا بهێنن و خۆشی شەهیدبوو، ره‌یحانی دایك چه‌ندین ساڵه له ده‌ست سته‌مكاری ئێرانی جێهێشتووه و له هه‌رێمی كوردستان نیشته‌جێبووه، به‌ڵام هه‌رێمی كوردستانیش نه‌بوو به په‌ناگه‌یه‌كی ئارام و سته‌می ئێران كردی به دایكێكی شه‌هیدی كۆرپه نه‌دیو.
له‌نێو كۆی دیمه‌نی هێرشه‌كانی رژێمی ئێران بۆ سه‌ر هه‌رێمی كوردستان، حكومه‌تی هه‌رێم له‌بری ئه‌وه‌ی چه‌وساندنه‌وه‌ی نه‌ته‌وه‌یی بكات به‌هێزی به‌ره‌نگاربوونه‌وه‌ی سته‌مكاری، ده‌یكات به ئامرازێكی دیكه‌ی قبوڵكردنی سته‌مكاری؛ بۆیه حكومه‌تی هه‌رێم به به‌یاننامه كورت و كه‌م وشه‌كانی ده‌یه‌وێت خودپاكانه‌یی و بێده‌نگی له‌به‌رامبه‌ر ئێران بكات به ستراتیژی مامه‌ڵه‌كردن له‌گه‌ڵ تاوانەكانی ئه‌و وڵاته‌دا، هه‌روه‌ك ئه‌وه‌ی له‌بۆردومانه‌كانی ٢٨ی ئه‌یلولی ئه‌م ساڵ و ٨ی ئه‌یلولی ساڵی ٢٠١٨ی كۆیه و بۆردومانه‌كانی ٢٥ی نیسانی ٢٠٢٢ له هه‌ولێر كردی.
بۆیه له‌پشت دێڕی به‌یاننامه نووسراوه‌كانی حكومه‌ت و حیزبه‌كانی ده‌سه‌ڵات خواستی رازیبوون به ژێرده‌سته‌یی نه‌ته‌وه‌یی وه‌ك چاره‌نووسێك هه‌یه، ئه‌مه‌ش له‌پێناو مانه‌وه‌ی پێگه‌ی به‌هێزی ئه‌و حیزبانه له‌لای ئێران.
له‌گه‌ڵ ئه‌وه‌شدا له‌به‌یاننامه‌كاندا هێزه سیاسییه‌كان "ئیدانه"ی هێرشه‌كان ده‌كه‌ن وه‌ك ده‌رخه‌ری ناڕه‌زایه‌تی و نیگه‌رانی ده‌ربڕین، به‌ڵام له‌بنه‌مادا ئه‌و وشه و دێڕانه ته‌نیا هه‌ڵوێستی سه‌ر كاغه‌زن و له‌سه‌ر شه‌قامه‌كان هێرش ده‌كه‌نه سه‌ر ئه‌و كه‌سانه‌ی پشتیوانی له خه‌باتی خه‌ڵكی رۆژهه‌ڵاتی كوردستان ده‌كه‌ن.
بۆ نموونه بافڵ تاڵه‌بانی له‌میانی به‌یاننامه‌یه‌كی دژ به هێرشه‌كانی ٢٨ی ئه‌یلولی ئێران وتی "دەمەوێت هەموو لایەك دڵنیابكەمەوە بە ئامانجگرتنی هاووڵاتییانی هەرێمی كوردستان و تێكدانی سەقامگیری خاكەكەمان هەرگیز لە یادناكەین و خوێنی خەڵكەكەمان لەبیرناچێتەوە".
به‌ڵام له‌هه‌مان رۆژ و كاتدا هێزه‌كانی حیزبه‌كه‌ی بافڵ تاڵه‌بانی له‌ئاسایشی سلێمانی یه‌كێتی و پۆلیس، به به‌كارهێنانی گازی فرمێسك رێژ و داری كاره‌بایی، كۆڵان به كۆڵان به شوێن ئه‌و كه‌سانه‌وه‌بوون به‌شدارییان له‌گردبوونه‌وه‌ی "پشتیوانی له ئازادیخوازانی كوردستان و ئێران" كردبوو. له‌نێو ئه‌و خه‌ڵكه ئازادیخوازه‌ی سلێمانی له (سه‌هۆڵه‌كه) ده‌یان كه‌سایه‌تی هه‌بوون، به‌شێكی زۆری ته‌مه‌ن و گه‌نجی خۆیان له رووبه‌ڕووبوونه‌وه‌ی سته‌می رژێمی به‌عس به‌كارخستووه، به‌ڵام ئه‌و رۆژه ئه‌و ئازادیخوازانه له‌ژێر "پۆستاڵی دیموكراسی" یه‌كێتی نیشتیمانی بوون و رووبه‌ڕووی ئه‌شكه‌نجه‌دان و به‌ركه‌وتنی توندی گازی فرمێسك رێژبوونه‌وه.
یه‌كێك له‌و كه‌سانه ته‌حسین قادر-ه كه به هۆی راپه‌ڕینی ١٩٩١ له په‌تی سێداره‌ی ئه‌منه سووره‌كه رزگاری بوو. یه‌كێكی دیكه‌یان رازاو گوڵه مه‌حمود-ه كه ته‌مه‌نی منداڵی و لاوی له خۆحه‌شاردان له به‌عس به‌سه‌ربرد و جگه له دایك و باوكی برایه‌كیشی شه‌هیده، ماڵەكەیان رووخێندرا و جگە لە روفاتی برا گوللەبارانكراوەكەی رووفاتی دایك و باوكیان تا ئێستاش نەدۆزراوەتەوە. شەونم باساکی-ش برایەکی لەسەردەمی بەعسدا گوللە بارانکرا و ماڵەکەیان روخێنرا.
ده‌ستگیركردنی ئازادیخوازانی سلێمانی به‌هۆی پشتیوانیان بۆ خه‌باتی رۆژهه‌ڵاتی كوردستان و بە زۆر بڵاوەپێكردنیان لەلایەن هێزەكانی "پۆستاڵی دیموكراسی" به‌ڵگه‌ی درێژه‌پێدانی یه‌كێتیه بۆ پاراستنی به‌رژه‌وه‌ندییه ئێرانییه‌كانی و فەرامۆشكردنی بەها راستەقینەكانی دیموكراسی.
به‌رده‌وامی سیاسه‌تكردنی حكومه‌ت و پارته‌كانی ده‌سه‌ڵات به‌م دووفاقییه، هه‌رێمی كوردستان ده‌گه‌یه‌نێته ژێرده‌سته‌ییه‌كی بنبه‌ستی ئێرانی و توركی.