ژنانی ئاوارە ناچارن بە پارەیەکی کەم کاتێکی زۆر کار بکەن
ژنانی ئاوارەی سوریا لە پێدەشتەکانی شارەزووردا ناچارن بە پارەیەکی کەم کاتێکی زۆر کار بکەن، تا بژێوی ژیانیان دابین بکەن.
![](https://jinhaagency.com/uploads/so/articles/2022/07/20220727-03705-00-00-02-00-still293-jpg947d3e-image.jpg)
میهرەبان سەلام کاکەیی
هەڵەبجە- کێڵگەیەکی پەتاتە لە سنوری شارۆچکەی سەیدسادق سەدان کرێکاری ژن کە ئاوارەی سوریا و ڕۆژئاوای کوردستانن، سەرقاڵی کۆکردنەوەی پەتاتەن بۆ خاوەن کێڵگە کوردەکان، سەختی ژیانیان و ئاوارەیی و شەڕ و بەڕێوەبردنی خێزان و نەبوونی داهات، ناچاری کردوون بە کاتێکی زۆر و پارەیەکی کەم لەبەر تیشکی گەرمی خۆر و ماندوویەتییەوە کار بکەن.
وەردە عەبدوڵا، نمونەی یەکێک لەو ژنانەیە لە کێڵگەکاندا پەتاتە کۆدەکاتەوە، دانیشتووی کامپی باریکەیە لە عەربەتی سەر بە پارێزگای سلێمانی، خاوەنی هەشت منداڵە، خۆی و چوار لە کچەکانی بە ڕۆژانەی پازدە هەزار لە کاتژمێر چواری بەیانی بۆ ١١ی نیوەڕۆ کار دەکات.
وەردە عەبدوڵا دەڵێت: ئێمە کۆمەڵێک ژنین پێکەوە کاردەکەین، هەموو خزم و دۆست و دراوسێین، بە ئۆتۆمبێل دێین و دەست بەکارکردن دەکەین و ناچارین بژێوی ژیانمان دابین بکەین، هەر چەند پارەکەمان کەمە، ساڵانی ڕابردوو خواردن و ئاو لەسەر خاوەنکار بوو بە ٢٥ هەزار، بەڵام ئەمساڵ دەڵێن دەبێت خۆتان خواردن بێنن و بە ١٥ هەزار دینار کاردەکەین.
سەبارەت بەوەی بۆ ناچارن بەو شێوەیە کار بکەن، وتی: "هەشت منداڵم هەیە و دەبێت دایکیشم بەخێوبکەم، بە خۆشی خۆمان نییە ناچارین کار بکەین و بژێوی ژیان دابین بکەین، لە هەژاریماندایە"، ئەو بژیوییەی بەو ڕەنج و سەختییەی ژنان کۆیدەکەنەوە بە هۆی گرانی بازاڕەوە ناتوانن هەموو پێداویستییەکانی ژیان دابین بکەن.
چیرۆکی وەردە نمونەیەک بوو لەو هەزاران ئاوارە و سەدان کرێکارەی ڕۆژانە لەپێناو بەدەستهێنانی بژێوی بۆ خێزانەکانیان، بەبێ گوێدانە پلەی گەرمای هاوین و سەرمای زستان بێ ماندووبوون کاردەکەن.