ناوەندی هەواڵ

 

بەرپرسانی کلتوریی ناوەندی کلتوری "پل سرخ" لە کابولی پایتەختی ئەفغانستان، لە تۆڕی کۆمەڵایەتی خۆیان بڵاویان کردەوە کە ناوەندەکەیان بەهۆی کێشەی ئابوورییەوە دادەخەن و کەلوپەلەکانیان هەرزان فرۆش دەکەن.

 

ناوەندەکە لە ڕاگەیەندراوەکەیاندا ئاماژەیان بەوەداوە، " ئێمە بەڵینمان دابوو لە هەر هەلومەرجێکدا بەردەوام دەبین لە چالاکیەکانمان و ناهێڵین تاریکی بەری ڕووناکیمان لێبگرێت، باوەڕمان وابوو کە وڵات لە ڕێگەی کتێب و کلتورەوە ئاوادەبێت، دەمانویست بچینە ناو سەنگەرەکانی جەنگ و لەجیاتی میلی تفەنگ کتێب دابنێین و بە دوای خەونی گەورەدا بگەڕێین و ئەفغانستان لە زوڵم، نەزانی و شەڕ دووربخەینەوە".

 

هەر لە ڕاگەیەندراوەکەدا هاتووە، "کاتێک کابول ڕووبەڕووی شەڕ بووەوە، پل سرخ و ئەندامەکانی جلوبەرگ، نان و پێداویستی تەندروستییان بۆ ئاوارەکان دابین دەکرد، شەرمەزارم کە ناوەندی کلتوری پل سرخ بە خەون و ئاواتەکانییەوە هەرزان فرۆش دەکەین".

 

پل سرخ یەکێکە لە ناوچەکانی کابول کە زۆرینەی ناوەندە ڕۆشنبیریەکانی وەک کتێبخانە، کاری دەستی، خولی میوزیک و تابلۆکێشان و کافتریای تێدا کۆبووەتەوە، ڕۆژانە چەندین کەس سەردانیان دەکرد، بەڵام دوای ڕووخانی حکومەتی پێشوو و دەستبەسەرداگرتنی کابول لەلایەن تاڵیبانەوە ئەم ناوەندە ڕۆشنبیرییە دادەخرێت.