Navenda Nûçeyan – Du jinên pîr ên Belûc ku her yek nêzîkî 70 salî bû, li deriyê sînor ê Milk ê li parêzgeha Sîstan û Belûcistanê rastî lêdana pasdarên Îranê hatin. Vê bûyerê careke din fikarên li ser tundûtûjiya hêzên Pasdarên Şoreşê yên Îranê ya li dijî jin û welatiyên li herêmên sînor derxist holê. Tê ragihandin ku jinên birîndar tenê hewl dane ku benzînên ku hildigirtin bistînin, wan ji bo dabînkirina pêdiviyên xwe yên rojane difroşin.

Dibe sedema fikaran

Piştî vê bûyerê, komek ciwan û çalakvanên ji civaka Belûc, daxuyaniyek weşandin, bûyer şermezar kirin û daxwaza lêpirsîn û cezakirina tavilê ya sûcdaran kirin. Komê tekez kir ku tundûtûjiya li dijî welatiyan, nemaze jinên pîr, nayê qebûlkirin û divê hêzên ewlehiyê û berpirsên dadwerî berpirsyar bên girtin.

Ev bûyer beşek ji rêze raporên vê dawiyê ye ku li ser tundûtûjiya hêzên Supaya Pasdaran a Îranê li dijî kolberan, barkêşên sotemeniyê, jin û zarokan a li Belûcistanê hatiye dîtin. Ev bûyer fikaran li ser piştgiriya ku ji hêla saziyên asta bilind ve ji sûcdarên van kiryaran re tê dayîn, derdixe holê.