Silêmanî – Duho bi beşdarbûna gelek çalakvan, siyasetmedar û hemwelatiyan înisiyatîfa DEFEND KURDISTAN a li dijî dagirkeriyê li kolanên Silêmanî kom bûn, dest bi meşekê girseyî kirin. Lê meşa ku bi armanca şermezarkirina êrişên dagirkeriya dewleta tirk a li ser xaka Kurdistanê, wêrankirina wî ya xwezaya Kurdistanê û bikar anîna çekên kîmyewî hat lidarxistin ji aliyê hêzên ewlekariya Silêmanî ve hat astengkirin.

Pşitî astengiya hêzên ewlekariyê jinan bi armanca şermezarkirina vê astengiyê Cada Selîm a Silêmanî  girtin û li ser êrişên dagirkeriya dewleta tirk û astengkirina meşê ya ji aliyê hêzên ewlekariyê, daxuyanî hat xwendin.

“Dewleta tirk dixwaze bi êrişên dagirkeriyê re vegere sedsala 19’emîn”

Şêwirmeda hiqûqê û rexnegira siyasî Siruşt Helebce destnîşan kir ku ewê li dijî êrişên dagirkeriya dewleta tirk bê deng nemînin û bal li ser bêhelwestiya hikûmeta Iraqê kişand. Siruşt Helebce wiha got: “Li gor zagonê hewaya di nav sînoran de di bin venêrîna Iraqê de ye û divê li hemberî vê xwedî helwest be. Pêwiste gel wisa bike ku hikûmet neçarî helwestgirtinê be. ”

“Em piştgiriyê didin şervanên azadiyê”

Bahre Zaher a beşdarî meşê bûbû wiha axifî: “Ji aliyê hêzên ewlehiyê ve astengkirina meşê îspat kir ku ew jî mîna  yên li Behdînan û Hewlerê piştgiriyê didin dagirkeriyê. Li Zaxo û Behdînanê bi hezaran dar tên birîn. Dewleta tirk bi kilometreyak ket xaka Başurê Kurdistanê. Lê li Silêmanî li ser erd û gelê me axiftina me tê qedekirin.”