NORŞAN EBDΠ

Kobanê – Dengê jinên Bakur û Rojhilatê Sûriyeyê, li dijî êrîşên li Xezayê bilind dibe û jin êşek hevpar û hevgirtinek kûr a mirovî bi jin û zarokên Zîvala Xezayê ya dorpêçkirî re tînin ziman.

Bûyerên ku li Xezayê diqewimin, bûyerên sala 2014'an tîne bîra jinên bajarê Kobanê ya Bakur û Rojhilatê Sûriyeyê ku rastî êrîşên çeteyên DAIŞ’ê hatin. Jinên Kobanê diyar dikin ku civaka navneteweyî ji bo bidawîkirina êşa sivîlên li Xezayê, gavên rasteqîn navêje. 

‘Bêdengiya li hember trajediya Xezayê didome’ 

Medîna Muslim, qala trajediya ku li Xezayê diqewime kir û wiha dest bi axaftina xwe kir: "Em rewşa jin û zarokên Xezayê dibînin ku bi xela, kuştin û dorpêçiyê re rû bi rû dimînin. Bi taybetî jin û zarok, gelê Xezayê rastî binpêkirinên herî hovanê tê. Tevî van hemû bûyeran jî cîhan bêdengiya xwe diparêze. Em helwestên welatên Rojhilata Navîn ên li hember zarok û jinên Xezayê şermezar dikin. Divê Yekîtiya Ereban agirbestê bicîh bîne, xurekê ji bo Xezayê bişîne. Divê dorpêça li ser gel rake, lê berevajî vê yekê bêdeng maye û ji bo wan tiştek nake." 

‘Êşa hemû jinên cîhanê êşa me ye’

Medîna Muslim, destnîşan kir ku jinên Bakur û Rojhilatê Sûriyeyê êş û trajediya gelê Xezayê hîs dikin û wiha got: "Em jî bi dorpêçkirin û komkujiyên dagirkeriya Tirk re rû bi rû man. Ji ber vê, helwesta me her tim zelal û teqez e. Dema ku jin û zarok tên qetilkirin û zarok ji birçîna jiyana xwe ji dest didin, em gelek xemgîn dibin. Êşa hemû jinên cihanê, êşa me ye. Tiştên ku li Xezayê diqewimin û tiştên ku zarok dijîn piştrast dikin ku mirovahî li wir miriye. Ev yek jî li ser eniya mirovahiyê û welatên Ereban lekeyek tarî ye. Em ji Komkara Erebî daxwaz dikin ku helwesta xwe ya li hember rewşa Xezayê, ji bo jin û zarokên Xezayê bi zelalî diyar bike." 

'Em êşa jinên Xezayê hîs dikin û piştgirî didin wan’

Wehîda Xelîl, da zanîn ku her tim mexdûrên şer û pevçûnên hêzên hegomanîk jin û zarok in û li Xezayê jî ev yek carek din eşkere bûye. Wehîda Xelîl diyar kir ku ew êşa gelê Xezayê hîs dikin û wiha pê de çû: “Em jî bi binpêkirin û komkujiyan re rû bi rû man. Lê ji ber ku em gelekî xwedî felsefe û nêzîkatiyek têkoşîn û azadiyê ne, bi rêxistina xwe li hember hemû binpêkirinan disekînin. Me ax û nasnameya xwe di xeta parastina rewa de û bi şerê gelê şoreşgerî parast. Lê ji ber ku li Xezayê gel rêxistinkirî nîne, dibe mexdûrê şer û pevçûnan. Herî zêde jin û zarok ji van şeran bandor dibin. Ji ber vê em êşa jinên Xezayê hîs dikin û hevgirtina xwe bi wan re nîşan didin." 

‘Xwe birêxistin bikin'

Wehîda Xelîl, bêdengiya rêxistinên mafên mirovan a li hember trajediya Xezayê şermezar kir û got: "Rêxistinên mafên mirovan qaşo parastina mafan dikin, lê li hember êşa Xezayê tu helwestan nîşan nadin. Bêdengiya wan hevkariya bi êrîşkeran re ye. Em bang li rawestandina komkujiyên Xezayê dikin. Her wiha em bang li jinên Xezayê dikin ku li hember her cure qirkirin û komkujiyan xwe birêxistin bikin û ji bo doza xwe têbikoşin.”