Navenda Nûçeyan – Îsraîl ji 7’ê Cotmeha 2023’an vir ve bênavber êrîşên xwe yên li ser Xezayê didomîne.

Hejmara kesên di êrîşan de mirin wekî 61 hezar û 369 û hejmara birîndaran jî wekî 152 hezar û 850 hate ragihandin. Li Zîvala Xezayê ku ji ber êrîş û dorpêça Îsraîlê birçîbûnek heye, di 24 saetên dawî de zarok jî di nav de pênc Filistîniyên din ji birçîbûnê mirin.

Zîvala Xezayê, ji ber êrîşên Îsraîlê û dorpêça ku alîkariya mirovî sînordar dike, bi birçîbûneke berfireh û kêmbûna av, derman, pêdiviyên bijîşkî û berhemên paqijiyê felaketeke mirovî ya kûr dijî. Li Zîvala Xezayê mirinên ji ber birçîbûnê, bi taybetî di nav zarokan de, zêde dibin. Hatiye destnîşankirin ku Îsraîl "birçîbûn û tîbûnê wekî çek" bi kar tîne.

Artêşa Îsraîlê, piştî wêrankirina ji sedî 88’ê Xezayê, Filistîniyên ku ji ber fermanên dersînorkirinê ji cih û warên xwe bûne li deverên ku ew lê dimînin, hedef digire. Li gorî raporê li Xezayê ku nifûsa wê nêzîkî 2.3 milyon e, hejmara mirovên ku ji ber êrîşên Îsraîlê û fermanên dersînorkirinê ji cih û warên xwe bûne gihîştiye 2 milyonî û gelek kesên din jî gelek caran ji cih û warên xwe bûne.

'Mirov her roj bê deng dimirin’

Midûrê Giştî yê Wezareta Tenduristiyê ya li Xezayê Munîr el-Burş, duh di posteke li ser hesabê xwe yê X de agahiyên li ser kesên ku li Xezayê ji birçîbûnê mirine parve kir. Di postê de hevoka "Mirov her roj bê deng dimirin û trajedî berdewam dike" hebû û her wiha parve kir ku 11 Filistîniyên din ji ber birçîbûn û nebesiya xwarinê mirine.