Navenda Nûçeyan – Li herêma Belûcistanê ya Pakistanê ji ber binpêkirinên heyî, aloziyên di navbera hikumetê û aktîvîstên xwecihî de her diçe zêde dibin.

Xwişka parêzvana mafan a girtî bijîjk Mehrang Belûc, Nadiya Belûc di parvekirina li ser hesabê xwe yê X’ê de ragihand ku heyetek ji rayedarên ewlehî û hikumeta Komara Îslamê ya Pakistanê pêk tê serdana girtîgeha ‘Heda’ ya li bajarê Quetta kirine. Nadia Belûc di parvekirinê de diyar kir ku daxwaz ji Mehrang Belûc û rêxistina Yekitiya Belûc û hevalên wê hatiye kirin ku ger xebatên siyasî û protestoyên li welat bidin sekinandin, wê werin berdan lê belê wan ev yek qebûl nekirine. Di heman demê de di parvekirinê de hat destnîşankirin ku Mehrang Belûc ji bo mafên gelê Belûc dê têkoşîna xwe bidomîne.

Roja 30’yê Adarê hatibû girtin

Mehran Belûc di sibeha roja Şemiyê ya 30’ê Adarê saet li derdora 5:30’an de, di serdegirtina polîsên Pakistanê û hêzên leşkerî di çalakiya rûnistinê ya li cadeya Sarya Shall de hat girtin. Di vê serdegirtinê de çend xwepêşandêran jiyana xwe ji dest dan û cenazeyên wan ji qadê revandin. Ji endamên navenda Komîteya Piştevaniya Belûc Dr. Sabîha Belûc, diyar kiribû ku wê ji bo kesên jiyana xwe ji dest dane merasîma cenaze li dar bixin û piştî merasîmê wê çalakiya xwe ya rûnistinê bidomînin.

Piştre derket holê ku yên di serdegirtinê de jiyana xwe ji dest dane bi veşartî hatine definkirin. Piştî ku ev agahî belav bû, çalakî hatin lidarxistin lê belê mudaxeleya polîsan ji bo van çalakiyan tund bû. Piştî êrîşên polîsan yek jê zarokek 13 salî, herî kêm sê hemwelatiyên Belûcî jiyana xwe ji dest dan. 36 kesên ku beşdarî çalakiyê bûne birîndar bûn. Hat ragihandin ku rewşa 7 birîndaran giran e.