NAVA KARÎMÎAN

Pîranşar – Di rojên dawî yên meha Cotmehê de, bajarên Pîranşar û Lajanê malovaniya 4’emîn Mîhrîcana Şanoyê ya Kolanan a Herêmî ya ‘Zab’ (an ‘Zê’) dikin. Karnavala gel a ku di roja vekirina mîhrîcanê de hate lidarxistin, ji aliyê niştecihên herêmî ve bi eleqeyek mezin hate pêşwazîkirin. Her çend hejmara jinan di şahiyê de ku reqsên Kurdî û çalakiyên cûrbecûr ên pîrozbahiyê kêm be jî, gelek jinan wek temaşevan cih girtin.

Li gorî organîzatoran, Mîhrîcana Şanoyê ya Kolanan a Herêmî ya ‘Zab’ armanc dike ku piştgirî bide hunermend û hunerên performansê, potansiyela çand û hunerî ya herêmê nîşan bide û parvekirina ezmûnan di navbera komên şanoyê de hêsan bike.

Hejmara jinan sînordar ma

Mîhrîcana ku di navbera 19 û 22’yê Cotmehê de li Pîranşar û Lajanê hate lidarxistin, 12 performansên şanoyê ji parêzgehên Urmiye, Tebrîz, Sine, Hemedan û Xorasan-î Rezewî pêşkêş dike. Lîstikvanên jin bi awayek xurt ligel hevpîşeyên xwe yên mêr têne temsîlkirin, lê tenê du derhêner jin in: Nazîla Emînî (ji Xiosê) bi lîstika xwe ya ‘Mucîdê bê pere’ ‘The Penniless Inventor’ (*Mokhtare-e Bi-pool*) û Behnaz Ghurtasî (ji Seqizê) bi lîstika xwe ya ‘Pêlavên Miradan’ *Wishing Shoes* (*Kafsh-e Arezouha*). Weke din, Nazila Îranzad tekane jina ku di juriya pênc kesî de cih digre ye.

Li Îranê, şanoya kolanan wek pirek di navbera huner û pirsgirêkên ku qada giştî û civak pê re rûbirû ne tê dîtin. Lê belê, ne diyar e ku mîhrîcana ‘Zab’ heta kijan astê van pirsgirêkan çareser dike, bi taybetî jî yên girêdayî jinan.

‘Hebûna jinan a fîzîkî têr nake’

Lîstikvana şanoyê Samaneh M. diyar kir ku tenê hebûna jinan têr nake û wiha got: “Beşdariya jinan di şanoya kolanan de tenê bi hebûna wan a fîzîkî li ser dikê nayê pîvandin. Li şûna wê, pêwîst e ku mirov li rêjeya beşdarbûna wan di hilbijartina mijaran, derhêneriyê û pêvajoyên biryargirtina hunerî de binhêre. Her çend şanoya kolanan dikare wek platformek ji bo jinan ku li ser ezmûnên xwe bifikirin û newekheviyên zayendî rexne bikin xizmetê dike jî, di pergalên hilberîn, vegotina çîrokan û performansê de, dema wekhev ji bo jinan firsend bê pêşkêşkirin, di rastî de mirov dikare bêje wekhevî tê parastin.”

Çalakiyên cûda dê bên lidarxistin

Li aliyê din di salên dawî de, faktorên aborî û siyasî siya xwe avêtine ser hunerên Rojhilatê Kurdistanê. Di vê çarçoveyê de, lidarxistina 4’emîn mîhrîcana Zabê, di demek ku bûyerên din ên girîng ên navneteweyî yên wekî mîhrîcana  Şanoya Kurdî li Seqizê hatine paşxistin de, ji bo kesên di warê hunerê de dixebitin pir girîng e.

Li gorî sekreteriya mîhrîcanê, performansên sereke yên ku divê ji hêla juriyê ve bên nirxandin li Parka Koodak (Zarok) a Pîranşarê têne lidarxistin, performansên din ên giştî jî li parkên Nîlûfer, Ferheng, Lale û Hayyam têne lidarxistin. Her wiha, pêşangehek ku hunerên destan û hunerên herêmî nîşan dide, li qada mîhrîcanê tê lidarxistin.