ZIHÛR EL-MEŞREQÎ

Tûnis- Li cîhanê bi taybetî rojnamevanên jin bi gefan re rûbirû dimînin. Rojnamevanên jin ên Sûrî jî zêdetir bi zextan re rûbirû ne. Ji ber ku ew û rejîmên otorîter û komên çekdar rastî hev tên. Herî dawî nûçegîhana ajansa me tevî jinên ku pê re hevdîtin pêk anî ye, rastî gef û êrîşa fîzîkî ya kesên nenas hatin. Tevî van metirsiyan, rojnamevanên jin ên Sûrî xebatên xwe didomînin. Ev jî wan dike sembola berxwedan û têkoşînê ya li hember zordarî û tirsandinê.

Têkoşîna rojnamevanên Tûnisê û Sûriyeyê hevpar e

Tevî şert û mercên cuda yên di navbera Tûnis û Sûriyeyê de, rojnamevanên jin li her du welatan bi têkoşîneke hevpar a ji bo azadiya çapemeniyê û mafê jinan ku karê çapemeniyê bê sînor pêk bînin, yek in. Bilindkirina dengên hevgirtinê yên ji Tûnisê, ne tenê piştgiriyeke manewî ye. Ew tê wateya ku pirsgirêka rojnamevanên jin ên Sûriyeyê, her rojnamevanek ku bi azadiyê bawer dibe, eleqedar dike.

'Piştevaniya rojnamevanan erkek ehlaqî û pîşeyî ye'

Endama Yekîtiya Netewî ya Rojnamevanên Tûnisî Rîm Saoudî diyar kir ku rojnamevanên jin li Sûriyeyê bi zextên jiyanê re dijîn û wiha got: “Kêşe li ser wan tên ferzkrin. Pergalên ku perspektîfên xwe ji ol digrin, her tim jinan dikin hedef. Azadiya wan ne tenê wek hemwelatî, wek rojnamevan jî sînordar dikin. Hevgirtina me bi rojnamevanên jin ên Sûrî re ne alternatîfek e, ew erkek ehlaqî û pîşeyî ye jî. Erka me ye ku em piştevaniya wan bikin. Ji ber ku azadiya çapemeniyê nekarî bê perçekirin û her binpêkirinek li dijî rojnamegerek jin, li her derê êrîşek li ser hemû pîşeyê ye. Sekin û têkoşîna rojnamevanên jin li Sûriyeyê, beramberî zextên ku tê jiyîn, azadiya îfadekirinê û serxwebûna rojnamegeriyê nîşan dide.”

'Rojnamevanên jin tevî zextan bi îsrar berdewam dikin'

Rojnamevana Tûnisî Henan El-Arîd girîngiya piştgiriya rojnamevanên Sûriyeyê yên jin anî ziman û wiha got: "Divê piştevanî bi riya daxuyanî û çalakiyan tenê sînordar nemîne. Divê em balê bikşînin ser qurbaniyên wan di şopandina bûyeran de û amadekirina raporên lêkolînê. Ji berpirsyariya me ye ku em pênûsên xwe ji bo kişfkirina rastiyan bikar bînin. Rojnamevanên jin li herêmên bi nakok bi kêşeyên dijwar re rûbirû dimînin. Tevî van zextan jî ew di xebatên xwe de bi biryar berdewam in. Divê hevgirtina bi wan re ne tenê bi slogan be, divê ew sozek rast be ku bi nivîsandina êş û azarên wan û piştgirîkirina wan a li ser platformên medyayî yên cihêreng were kirin."