Navenda Nûçeyan – Êrîşên çekdarî yên berdewam li çend herêmên Maliyê rêjeyên koçberiyê zêde kirine. Di heman demê de kêmbûna xwarin û xizmetên bingehîn di nav tundiya berdewam û zehmetiya gihandina alîkariyê ji bo nifûsa bandordar de zêde dibe.

Komîserê Bilind ê Mafên Mirovan ê Neteweyên Yekbûyî duh fikarên xwe yên mezin li deverên cûda yên Maliyê derbarê rewşa mafên mirovan a ku bi lez xirab dibe, anî ziman. Piştî êrîşên berfireh û hevrêzkirî yên ku ji hêla komên çekdar ve li dijî çend bajar û bajarokên di 25-26’ê Nîsanê de hatine kirin, ev fikar zêde bûn.

Ji ber pevçûnan rewşa mirovî xirabtir bûye

Li gorî raporan, di encama van êrîşan de hejmareke mezin ji sivîlan mirin û zêdetir niştecih ji malên xwe koçber bûn. Raporên din destnîşan kirin ku di dawiya hefteyê de li bajarokên HomborÎ, Gourma û Rharous di navbera hêzên ewlehiyê yên Malî û şervanên Tevgera Neteweyî ya Rizgarkirina Azawadê (MNLA) û Koma Piştgiriya Îslam û Misilmanan (GSIM) de pevçûn derketin û rewşa mirovî ya jixwe xirabtir a, ji bo sivîlan xirabtir kir.

Banga rawestandina şer

Di vê çarçoveyê de, Komîserê Bilind ê Mafên Mirovan ê Neteweyên Yekbûyî banga rawestandina tavilê ya şer kir. Komîser ji hemû aliyan xwest ku mîsogerkirina parastina sivîlan û parastina binesaziya sivîl jî di nav de, bi tundî pabendî qanûna mirovî ya navneteweyî û qanûna mafên mirovan bibin.

Kuştin û binpêkirinên bê dadgeh

Raporan kuştin û revandinên bê dadgeh ên ji hêla endamên hêzên ewlehiyê ve piştî êrîşên dawiya Nîsanê hatine kirin nîşan da. Rapor dibêjin ku çend rayedar hatine revandin û yên din jî hatine lêdan û çarenûsa wan nediyar e.

Rayedarên Malî, lêpirsînek li ser êrîşên 25 û 26’ê Nîsanê ragihandin û pabendbûna xwe ya hesabpirsîna berpirsyaran piştrast kirin. Berdevkê Komîsyona Mafên Mirovan banga lêpirsînek berfireh kir ku hemû îdiayên binpêkirinan çareser bike û li gorî standardên navneteweyî yên mafên mirovan were kirin, rêzgirtina ji bo pêvajoya dadperwer û ne-cudakarî di girtin û binçavkirinan de mîsoger bike.

Krîza birçîbûnê girantir dibe

Raporên mirovî hişyarî didin ku krîza birçîbûnê li gelek deveran girantir dibe. Di 3’ê Gulanê de, şaredarê Diyafarabiyê bangek lezgîn ji rayedaran re şand û hişyarî da ku piştî xilasbûna kelûpelên xwarinê, niştecih bi birçîbûnê re rûbirû ne. Hem Diyafarabiyê û hem jî paytext Bamako ji aliyê koma Cema'at Nusrat el-Îslam wel-Muslimîn (JNIM) ve di bin dorpêçê de ne, ku wî ev tedbîr wek encamên nepejirandî ji bo sivîlan bi nav kir û daxwaz kir ku dorpêç tavilê were rakirin.