Şengal – Di çarçoveya kampanyaya ‘Rêber Apo bixwîne û bide xwendin’ de ku ji bo azadiya fîzîkî ya Rêberê Gelê Kurd Abdullah Ocalan hatiye destpêkirin û bi nêzhatina 4’ê Nîsanê Roja Rojbûna Ocalan bi pêşengtiya Tevgera Azadiya Jinên Êzidî (TAJÊ) li gundê Dohlayê semîner hat dayîn.

Di semînerê de berdevka TAJÊ Riham Hico li ser girîngiya kampanya û 4’ê Nîsanê de axivî.

Riham Hico diyar kir ku 4’ê Nîsanê wek roja vejîn û nûbûnê ye û wiha got: “4’ê Nîsanê wek rojbûna hemû mirovahiyê tê pîrozkirin. Hatina Rêber Apo û felsefeya wî ji bo hemû Rojhilata Navîn bû mîlatek. Bi saya Rêber Apo îro roj hemû civakên bindest ku êzidî di serî de  ji bo azadiya xwe diqîrîn. Li gel Rêber Apo civaka êzidî xwedî ciheke girîng e. Rêber Apo civaka êzidî tu carî ji hevdîtinên xwe bêpar nehiştiye û her ji bo civaka êzidî peyam şandiye.”

Piştî axaftinê ji hêla Çand û Huner a Stiya Nexşa ve li ser girîngiya kampanyaya ‘Rêber Apo bixwîne û bide xwendin’ şanoyek hat pêşkêşkirin.

‘Em bi nameya Rêber Apo gelek kêfxweş bûn’

Têkildarî mijarê Zerê Sebrî a beşdarî çalakiyê bûbû ji ajansa me re axivî û ev tişt anî ziman: “Îro li ser 4’ê Nîsanê semînerek pêk hat û di semînerê de nameya Rêber Apo ku ji bo me civaka êzidî şandibû hat xwendin. Em bi taybetî wekî jin bi nameya Rêber Apo gelek kêfxweş bûn. Em gelek serbilind in ku Rêberek bi vî rengî piştgirî dide jin û berxwedana wê.”

Her wiha Zerê Sebrî ji bo şahiya ku dê 4’ê Nîsanê li Baxçê Rêber Apo were lidarxistin jî banga tevlibûnê kir.