MEDÎNE MAMEDOGLU

Amed- Ji bo pîrozkirina sala 76’emîn rojbûna Rêberê Gelê Kurd Abdullah Ocalan ê ku li gundê Amara yê Xelfetiya Rihayê di 4’ê Nîsana 1949’an de hatiye cîhanê, amadekarî didomin. Meşvanên meşa Meclisa Ciwanan a DEM Partiyê ya ku 2’yê Nîsanê ji Amedê dest pê kir gihîştin Xelfetiyê. Îro jî dê di pêşengiya Tevgera Jinên Azad (TJA) de meşek were lidarxistin. Piştî Meşê dê roja 3 û 4’ê Nîsanê li Parka 4’ê Nîsanê ya Xelfetiyê û mala lê jidayik bûye şahî bidome. Bernameya ku bi pêşengiya Platforma Saziyên Demokratîk tê lidarxistin, li bendê ye ku bi hezaran kes beşdar bibin. Jinên ku ji bajarên din ji bo pîrozbahiyê ketine rê jî diyar kirin ku dê bi meşek daxwazên xwe bînin ziman û têkoşînê mezintir bikin.

Jinên ku ji Amedê ji bo pîrozbahiyê derketine rê, diyar kirin ku dê pîrozbahiya îsal bi coş û heyeyan be. Jinan diyar kir ku qedexe û astengiyên ku salên borî derdiketin dê îsal werin derbaskirin, pîrozbahî bi coş derbas bibin û hemû kesan roja 4’ê Nîsanê vexwendin Amarayê.

‘Dê îsal beşdariya pîrozbahiyê zêdetir û bi coştir be’

Endama Meclisa Şaredariya Gêlê Hacer Kurt, bal kişand ku beşdariya meşa Amarayê dê ji salên din zêdetir û bi coştir derbas bibe. Hacer Kurt da zanîn ku dê jin pêşengî ji vê coşê re bikin û wiha domand: “Em ê rojbûna Rêber Apo bi coş pîroz bikin û daxwazên xwe bînin ziman. Daxwaza me ya sereke rakirina tecrîda li ser Rêber Apo û berdana hemû girtiyên siyasî ye. Em ê ji bo xwe, ziman û nasnameya xwe wê rojê li Amarayê bin. Beşdariya jinan dê zêde be. Jinan tu carî hêviya xwe ji aştiyê nebirîn, ji bo vê têkoşiyan û dê têbikoşin. Em ê xwedî li banga 27’ê Sibatê derbikevin, mezin bikin û roja 4’ê Nîsanê li Amarayê bin. Divê dewlet jî di demek nêz de gavek bavêje û ji bo aştiyê bixebite. Ji bo vê jî daxwaza yekem dê rakirina tecrîda li Îmraliyê be. Aştî ji bo me hemûyan pêdiviyeke lezgîn e. Em ê li her derê xwedî li aştiyê derbikevin. Dê jin têkoşîna xwe hem ji bo aştiyê hem jî ji bo nasnameyê mezintir bikin. Em roja 4’ê Nîsanê bi hemû daxwaz û coşa xwe li qadan bin.”

‘Em ê bi mezinkirina têkoşînê xwedî li bangê derbikevin’

Endama Lijneya Rêveber a Şaxa Amedê ya Komeleya Hiqûqnasên ji bo Azadiyê (OHD) parêzer Gulşen Demîr jî li ser meş û pîrozbahiyan wiha got: “Banga aştiyê ya Rêber Apo, zêdetir bandorê li ser me jin û zarokan dike. Em ê jî ji bo vê bangê wê rojê li Amarayê bin. Em ê bi stran, govend û dirûşmên li wê derê bin. Tecrîd hê didome. Divê ev bêhiqûqî bi dawî bibe û hevdîtina bi malbat û parêzeran re birûkpûk be. Bi avêtina gavan re dê di warê aştiyê de jidilî çêbibe. Em jî bi daxwaza aştiyeke bi rûmet diçin Amarayê. Ji bo em vê biparêzin û mezin bikin jî em jin dê bi reng û dengê xwe hemû li Amarayê bin.”

‘Em ê bi coş û hêza xwe li Amarayê bin’

Emîne Kaya jî diyar kir ku dê jin bi reng û dengê xwe li Amarayê daxwazên xwe bînin ziman û got ku îsal bi banga hatiye kirin re, beşdariya pîrozbahiyê dê zêdetir û coştir be û wiha domans: “Ji bo mezinkirina felsefeya azadîxwaziya jinan û parvekirina vê coşê em ê li Amarayê bin. Dema em dinêrin dibînin ku li vî welatî jin rastî her cure îşkence, gef û qetliamê tên. Roja 4’ê Nîsanê hem em ê li dijî van dengê xwe bilind bikin, hem jî diyar bikin ku riya azadiya jinan têkoşîn e. Em niha di pêvajoyeke dîrokî re derbas dibin û bi coşa li Amarayê re dê girîngiya vê pêvajoyê mezintir bibe. Roja 4’ê Nîsanê em ê bi rengê jinan, hem daxwazên xwe yên ji bo aştiyê hem jî têkoşînê bînin ziman. Em ê li Amarayê bersivê bidin banga ji bo aştiyê. Wê rojê hem bi pîrozbahiyê, hem jî bi dengê ku em bilind bikin. Wê rojê hem bi pîrozbahiyan, hem jî bi dengê xwe yê bilind em ê careke din rastiya gelê Kurd bînin ziman.”