Mexmûr – Li Wargeha Penaberan a Şehîd Rustem Cudî (Mexmûrê) bi boneya 4’ê Nîsanê rojbûna Rêberê Gelê Kurd Abdullah Ocalan, her sal ji aliyê Qada Perwerdê ve Mîhrîcana Çand û Werzîşê ya 4’ê Nîsanê tê lidarxistin. Îsal 17’emîn Mîhrîcana 4’ê Nîsanê ya Çand û Werzîşê di 18’ê Sibatê de bi turnûvaya futbolê destpê kir. Mîhrîcan îro jî bi pêşbirkên werzîşî didome.

Pêşandanên komên govendan

Tevahî xwendekarên wargehê bi awayek fermî berê xwe dan qada futbolê. Beriya ku pêşbirk destpê bike, ji bo tevahî cangoriyên azadiya Kurdistanê deqeyek rêz hat girtin. Piştî rêzgirtinê, komên govendan ên dibistanên seretayî bi cilên Kurdî di nava sahê de govend gerandin.

Piştre, xwendekarên keç û kur ên beşdarî pêşbirkên werzîşî bûne ala kesk, sor û zer hilgirtin û li dora sahê zivirîn.

Piştî wê, pêşbirkên werzîşî yên wek maraton, bezên 100 metre û 400 metre, pisqilêt û dirêj avêtin pêk hatin. Her wiha xwendekarên ku di pêşbirkan de pileyên yekemîn, duyemîn û sêyemîn girtin, hatin xelatkirin.