Navenda Nûçeyan – Êrîşên dewleta Tirk ên li hember Bakur û Rojhilatê Sûriyê û bi taybetî jî Bendava Tişrînê û Pira Qereqozakê berdewamin. Gelên li herêmê jî bi konvoyan diçin bendavê û tevlî nav nobeta berxwedanê dibin. Hêzên Parastina Jinê (YPJ) jî, ji bo astengkirina dagirkirinê ev nêzî 26 roj in berxwedana xwe didomînin.

‘Em bi hemû hêz û cesareta xwe bersiv didin êrîşan’

Fermandara YPJ’ê ya Kantona Firatê Amîra Muhammed, derbarê berxwedana li Bendava Tişrînê de axivî. Fermandar Amîra got ku “Em wek Hêzên Sûriya Demokratîk (QSD) û Hêzên Parastina Jinê (YPJ), li hember dewleta Tirk û çeteyên wê di refên herî pêş de têdikoşin. Dewleta Tirk û çeteyên xwe, herêmên Bakur û Rojhilatê Sûriyê dikin hedef û dixwazin ku herêma ku me bi xwîna şehîdên xwe rizgar kiriye, dagir bike. Em bi hemû hêz û cesareta xwe bersiv didin êrîşan.”

‘Pêkhateyên herêmê divê yekîtî û bihevrebûnê bihêztir bikin’

Fermandara YPJ’ê Amîra da zanîn ku ewê nehêlin dewleta Tirk û çeteyên wê bighên meqsed û miradê xwe. Amîra Muhammed, wiha berdewam kir: “Me bi berxwedana QSD û YPJ’ê, li hember rêxistinên terorê yên mîna IŞİD’ê şer kir. Çawa ku me IŞİD'ê têk biribe, emê dagirkeriyê jî têk bibin û li hember êrîşên sîstematîk ên li ser herêmên me bibin bersiv. Pêkhateyên li Bakur û Rojhilatê Sûriyê ku Kurd, Ereb û Suryanî jî di nav de ne, li hember êrîşan û şerê medyayî bi hev re rolek mezin dilîzin. Lewma pêwîst e pêkhateyên herêmê di vê asta hesas de yekîtî û bihevrebûnê bihêztir bikin. ”  

‘Em dixwazin serkeftinê bidest bixin’

Amîra Muhammed, balkişand ser rola jinan a di têkoşîna li hember şerê li dijî dewleta Tirk û çeteyên wê de dilîzin û wiha got: "YPJ di refên berxwedanê de xwedî rolek pir mezin e. Îro şervanên jin ji bo parastina mafên xwe û aramiya herêmê têdikoşin û lehengiyên herî bi heybet nîşan didin. Em dixwazin ku li herêma me ewlehî û aramî pêk bê û em serkeftinê bidest bixin. Li hember hêzên ku dixwazin herêmê bê aramî bihêlin, emê parastina axa xwe û rûmeta xwe bidomînin."