ŞIYA KOYE 

Koye – Cilên Kurdî, çanda netewa Kurd e. Her netewek bi cil û berg û çanda xwe tê nasîn û ew çanda nasnameya wan a netewî ye. Kurd jî pêşengên cilên Kurdî ne. Cilên ku xweşik û tu caran kevin nabine. Cihê kêfxweşiyê ye ku jinên destrengîn, hertim girîngî didin cilên Kurdî û kevneşopiya kofiya Kurdî. Roj bi roj jinên destrengîn karên jêhatîtir dikin.  

Li başûrê Kurdistanê, qeyrana aborî roj bi roj xirabtir dibe û bandorê li ser bazarên hemû qadên jiyanê dike. Lê belê daxwaza li ser cilên Kurdî wek xwe maye û xwediyên wan jî gora rewşa aborî ya xelkê nirxê wan kêmkiriye.

Rûniştvana navçeya Koye Bêxal Mehyedîn ku mamostaye û dîzyana cilên Kurdî dike, hewl dide çanda cilên Kurdî bi parêze û ji bo nasandina karê xwe beşdarî mihrîcanan dibe. Bêxal Mehyedîn, diyar kir ku qeyrana aborî û paşketina mûçeyan bandorê li ser nirxê kel û pelan dike û da zanîn destpêkê kofiyek bi 25 hezaran difirot, lê niha bi 15 hezar dînarê Iraqî difiroşe û li gel jî diyariyekê dide. 

Kofiyên herêmên cûda çêdike 

Bêxal Mehyedîn, wiha got: “Ez dixwazim tiştên ku çêdikin pêşkêşî xelkê bikim. Tiştên min zêdetir kofiyên ser cilên Kurdî ne û ez li gorî herêma Koye, Hewlêr, navçeya Behdînan û Silêmanî çêdikim.” 

‘Divê cilên Kurdî neyê paşguhkirin’ 

Bêxal Mehyedîn, da zanîn ku cilên Kurdî nasnameya Kurdayetiyê ye û wiha got: “Ev cilê li ber min şêwazê Kurdî ye û tu şêwazê Fars û Tirk me nexistiye di nav de. Lewma, divê cilên Kurdî wek xwe be û destkariyên cuda neyê kirin. Derfetê kar ji bo ciwanan nîne, tayîn nabin. Lewma girînge ku jin girîngî bidin hêz û kêrhatiyên xwe, ji malê derbikevin ji derve û berhemên xwe nîşan bidin û dahatekê ji bo xwe pêkbînin.” 

Ji bo jinan deriyekê ya debarê

Rûniştvana bajarê Silêmaniyê Jiyan Mihemed ku ji bo cilên Kurd karên destan dike û bi cil û bergên Kurdî beşdarî pêşangeh û mihrîcana dibe, têkildarî girîngiya dizayna cilên Kurdî wiha got: “Gelek girînge ku divê serdemê de girîngî ji bo cilên Kurdî bê dayîn û cilên me bi awayê xwe ya herî xweşik bimîne. Ev cilên min, hemû keda destê min e. Em wek koma tam û xwarinê, bi cilên xwe yên Kurdî beşdarî mirîcanan dibin  ku cilên xwe bidin nasîn û em dixwazin bi rêya van mihrîcanan çanda Kurdî û netewa gelê Kurd ji bo mirovên derve bidin nasîn.” 

Jiyan Mihemed di dawiya axaftina xwe de wiha got: “Ez bi xwe karmendim û van karan jî dikim. Divê hemû jinan hêz û kêrhatiyên xwe derbixîn pêş. Çi karê dîzayna cil û berg be, çi xwarinên kurdewarî an jî keda dest be, ferq nake. Bi vî awayî wê him karê xwe bikin û him jî debara jiyana xwe pêkbînin.”