Navenda Nûçeyan- Zext û pêla girtinê ya rejîma Îranê li dijî aktivîstên jin didome. Jin ji ber fikir û daxuyaniyên xwe yên aştiyane tên binçavkirin, girtin û cezayê darvekirinê li wan tê birîn.

Şeş sal cezayê girtîgehê da  Elham Ziretpîşe 

Li Parêzer û endama Komeleya Baroya Parêzgeha Farsê Elham Ziretpîşe, ji aliyê şaxa yekem a Dadgeha Şoreşê ya Şîrazê ve şeş sal cezayê girtîgehê, du sal qedexeya derketina derveyî welat û betalkirina pasaporta wê hate birîn.

Hûrgiliyên ceza

Li gorî biryara ku ji aliyê şaxa yekem a Dadgeha Şoreşê ya Şîrazê ve hatiye dayîn, Elham Ziretpîşe, ji ber sûcê ‘kombûn û hevkariya li dijî ewlehiya neteweyî’ pênc sal cezayê girtîgehê, ji dozeke din ji ber sûcê ‘propagandaya li dijî pergalê’ salek cezayê girtîgehê lê birîn.

Ji bilî cezayê girtîgehê, du sal cezayê qedexeya derketina derveyî welat lê hat birîn û pasaporta wê jî hat betalkirin. Ev ceza roja Înê, 2’ê Tîrmeha 2026’an, ji aliyê parêzera wê, Şehla Arojî ve bi fermî ji medyayê re hat ragihandin.

Di Gulanê de hat girtin

Elham Ziretpîşe di 4’ê Gulana îsal de li Dadgeha Ceza ya Şîrazê hat girtin. Ji dema girtinê ve heta derketina biryarê, pêvajoya lêkolîna doza wê li Dadgeha Şoreşê ya Şîrazê berdewam kir û di dawiyê de hat cezakirin.

Heta niha, der barê rewşa biryarê, îhtîmala îtîrazê, yan helwesta parêzer de li ser biryarê tu agahî nehatiye dayîn.

Hevdîtinên qanûnî yên berdewam bi parêzer re

Parêzer û endama Komeleya Baroya Parêzgeha Farsê Elham Ziretpîşe, berê ji ber çalakiyên xwe yên pîşeyî û sivîl, bangî wê hatibû kirin, hatibû girtin.

Biryara cezayê şeş sal girtîgehê û sepandina cezayên zêde li dijî vê parêzerê di demek ku di salên dawî de hejmarek parêzer ji ber çalakiyên xwe yên pîşeyî, parastina muwekîlan, an jî ramanên xwe bi dozên qanûnî, girtin û cezayên zindanê re rû bi rû mane de hat jiyîn; ev mijar her dem rastî bertekên rêxistinên mafên mirovan û parêzvanên mafên mirovan hatiye.

Salek cezayê girtîgehê dan Negîn Kiyanî

Li wênekêş û mamosteya wênekêşiyê ya li Babolê dijî Negîn Kiyanî, ji aliyê şaxa yekem a Dadgeha Şoreşê ya bajêr ve ji ber sûcê ‘propagandaya li dijî pergalê’ salek cezayê girtîgehê hat birîn. Li gorî raporan, bikaranîna hashtagên wekî ‘Na ji darvekirinan re’, ‘Jin Jiyan Azadî’ û ‘Sempatiya ji bo girtiyên siyasî’ li ser medyaya dîjîtal weke yek ji sedemên dayîna vê cezayê hat nîşandan.

Piştî ku doza wê ji aliyê şaxa yekem a Dadgeha Şoreşê ya bajêr ve hat dîtin, li Negîn Kiyanî bi sûcê ‘propagandaya li dijî pergalê’ salek cezayê girtîgehê hat birîn.

Hashtagên protestoyan di nav belgeyên dozê de cih girtin

Li gorî raporên hatine weşandin, bikaranîna hashtagên ‘Na ji darvekirinan re’, ‘Jin Jiyan Azadî’ û ‘Sempatî ji bo girtiyên siyasî’ li ser medyaya dîjîtal di nava delîlên sûcên  ‘propagandaya li dijî pergalê’ de hatine nîşandan.

Ev girtin, di demeke ku di salên dawî de, dozên dadwerî yên li dijî aktivîstên sivîl, hunermend, rojnamevan û bikarhênerên medyaya dîjîtal ji ber weşandina materyalên rexnegir an piştgiriya kampanyayên mafên mirovan zêde bûne, qewimîn.

Zexta li dijî hunmermendan û bikarhênerên medyaya dijîtal didome

Dayîna cezayek wisa ji bo Negîn Kiyani mînakek din a dozên dadwerî yên berdewam li dijî welatiyên ku çalakiyên wan di qada dîjîtal de yan piştgiriya wan a ji bo daxwazên sivîl ji hêla saziyên ewlehî û dadwerî ve bi sûcên siyasî û ewlehiyê tên bersivandin e. Aktivîstên mafên mirovan bi berdewamî li dijî sînordarkirina çalakiyên aştiyane li ser medyaya dîjîtal û sînordarkirina azadiya ramanê li Îranê hişyarî didin.